Saziyên hiqûqê yên li Colemêrgê ÎHD, OHD û Baroya Colemêrgê li dijî êrişên li ser Rojava daxuyaniyek dan û got: “Hikûmeta nû ya demkî ku bi serokatiya Ehmed Şer hatiye avakirin êkser berê xwe daye polîtîkayên otorîter û yekperest.”
Li Gevera nevçeya Colemêrgê, bi pêşengiya Komeleya Mafên Mirovan (ÎHD), Komeleya Hiqûqnasên ji bo Azadiyê (OHD) û Baroya Colemêrgê li dijî êrişên li ser Rojavayê Kurdistanê ku ji aliyê çeteyên HTŞ, DAIŞ û komên girêdayî Tirkiyeyê ve têne kirin, li ber Edliyeya Geverê daxuyanî da. Digel nûnerên saziyên hiqûqê, parlementerê Colemêrgê yê DEM Partiyê Onur Duşunmez û hevşaredarê Geverê Şoreş Dîrî jî tev li daxuyaniyê bûn. Metna daxuyaniyê ji aliyê parêzer Ferit Aksoy ê hevserokê şaxa OHDyê ya Colemêrgê ve hate xwendin.
‘Rêveberiya Xweser nasnameyên cuda ji xwe re esas digire’
Aksoy qirkirinên li ser gelê Rojava şermezar kir û got: “Pêkhateya civakî û siyasî ya Rojava li ser bingeheke demokratîk hatiye avakirin ku wekheviya gel, bawerî û nasnameyên cuda ji xwe re esas digire. Ev rêveberiya ku li Rojava hatiye avakirin ji aliyê raya giştî ya navnetewî ve hatiye qebûlkirin û ji bo Sûriyeyeke aştîxwaz û hiqûqî wekî tecrûbeyeke girîng hatiye nirxandin. Lêbelê piştî rûxandina rejîma Esed hate dîtin ku hikûmeta nû ya demkî ku bi serokatiya Ehmed Şer hatiye avakirin êkser berê xwe daye polîtîkayên otorîter û yekperest.”
