Siyasetmedarên Kurd Sêvê Demîr, Fatma Ûyar û Pakîze Nayir ên ku li navçeya Silopiya ji aliyê polîs û leşkeran ve di 4ê Çileya 2016an de hatibûn kuştin, hatin bibîranîn.
Li navçeya Silopiya ya Şirnexê Endama Meclîsa Partiyê ya DBPê Sêvê Demîr, Endama Kongreya Jinên Azad (KJA) Fatma Ûyar û Hevseroka Meclîsa Gel a Silopiya Pakîze Nayir ku di 4ê Çileya 2016an dema dixwestin ji taxa Karşiyaka derbasî taxa Ofîsê bibin ji aliyê polîs û leşkeran ve hatibûn kuştin. Her sê jinên welatparêz ên Kurd hatin bibîranîn.
Endam û rêveberên saziyên MEBYA-DERê, Tevgera Jinên Azad, Dayikên Aştiyê, TUHAD-FEDê, rêveber û nûnerên partiyên DBPê û DEM Partiyê bi sedan kes tev li bîranîna li Kolana Hunerê kom bûn. Di bîranînê de pankarta, “Azadîbûyîn dê bi xwedîderketina Sakîne, Sêvê, Fatma û Pakîzeyan pêk bê” hat vekirin û wêneyên sê jinên li Parîsê hatibûn kuştin û wêneyên sê jinên li Silopiya hatibûn kuştin, hatin hilgirtin.
Girseya ku li Kolana Hunerê kom bû destpêkê daxuyanî da. Beriya ku daxuyanî were dayîn ji bo cangoriyên azadiyê rêz hate girtin.
Piştî rêzgirtinê aktîvîsta Tevgera Jinên Azad (TJA) Adalet Fîdan got ku ew di kesayeta Sêvê, Pakîze ê Fatmayê de hemû jinên ku hatine kuştin bi bîr tînin û wiha axivî: “Zîhniyeta ku li vir hevalên me kuştin û zîhniyeta li Parîsê hevalên me kuştin, heman zîhniyet in. Lê em weke jinan em ê li her derê li dijî vê zîhniyetê têbikoşin.”
‘Ji hebûna jinan ditirsin’
Berdevka Meclîsa Jinan a DBPê Berîvan Bahçecî jî diyar kir ku hevalên wan ên hatine kuştin ji bo azadiya gelê Kurd û jinan têkoşiyan û wiha got: “Hevalên me yên hatine kuştin, têkoşîna nasnameya xwe dikirin, têkoşîna azadiya jinan dikirin, ji ber vê yekê hatin kuştin. Hişmediya ku heval Sêvê, Pakîze û Fatma kuştin îro jî astengiyan derdixe. Bila hişmediya kujer bizanibe ku jin tu demê paşde gavê navêjin. Divê ev hişmedî were guhertin û polîtîkayên li ser jinan werin guhertin. Ev hişmedî ji mirina me ditirse, ji hebûna me jinan ditirse, hûn çi dikin bikin em dev ji têkoşîna xwe bernadin.”
Dogan: Sûcê herî mezin kuştina her sê hevalên me ye
Berdevka DEM Partiyê Ayşegul Dogan jî anî ziman ku ew dizanin kê Sêvê, Pakîze û Fatma kuştiye û wiha axivî: “Ji Parîsê heya vir, ji vir heya her çar aliyê Kurdistanê kuştina jinên Kurd ne tiştek ji rêzê ye. Ev komkujî bi destên qirêj tên kirin û em îro tenê ne ji bo bîranînê li vir in, heman demê de em ji bo sozdayîna têkoşîna van hevalan li vir in. Dayîkên her sê hevalên me Sêvê, Fatma û Pakîze vaye 10 sal in li gel ewqas êşê jî dibêjin aştî. Li gel her pêkanînê aştiyê dixwazin dayîkên hevalên me. Ev hevalên me yên hatine kuştin, siyasetmedar bûn, xebata wan ne sûc bû lê kuştina wan sûcê herî mezin e. Hevalên me alîgirê azadiyê û aştiyê bûn. Dayikan xwest biçin cihê kuştina zarokên xwe û gul danin wir. Lê ev yek tê astengkirin.”
‘Bila dewlet destê aştiyê dirêj bike’
Dayîka Sêvê Demîr, Sakîne Demîr jî diyar kir ku ew bi keda cangoriyên xwe îro li ser pêyan e û got: “Zarokên me aştîxwaz bûn, wekhevî dixwestin û ji ber vê yekê hatin kuştin. Dema zarokên me şehîd ketin gotin bila xwîna me bi şeref birije ser vê axê. Em îro dibêjin aştî û bila dewlet jî li gorî vê yekê gavan biavêje. Em naxwazin tu kes bikeve navbera me û aştiyê pêk bîne. Bila destê rêzdar Ocalan bigirin û aştiyê pêk bînin. Ez bang li rayedarên dewleta Tirk dikim ku destê xwe dirêjî aştiyê bikin.”
Piştî daxuyaniyê li gel astengkirina polîsan jî gel heya avahiya DEM Partiyê ya Silopiya bi dirûşma, “Şehîd namirin” meş li dar xist.
