Serokwekîlê Koma DEM Partiyê Sezaî Temellî diyar kir ku gelên cîhanê di nava rejîmên otorîter û mudaxileyên emperyalîst de fetisîne û got: “Divê hiqûqa navneteweyî li dijî binpêkrinên mafên mirovan mudaxileyê bike. Pêwîstî jî bi vê yekê heye. Pêdivî bi hêzeke enternasyonal heye.”
Serokwekîlê Koma Partiya Wekhevî û Demokrasiyê ya Gelan (DEM Partî) Sezaî Temellî derbarê geşedanên di rojevê de ne li Meclîsê civîna çapemeniyê li dar xist. Sezaî Temelî anî ziman ku sala nû bi kriz û şer dest pê kiriye û got: “Geşedanên li Venezuelayê û piştre krîza gerdûnî nîşan dide ku gelên cîhanê di nava mudaxileya mperyalîst û rejîmên otorîter de fetisîn e. Ji ber mudaxileya emperyalîst û rejîmên otorîter dinya hemû ketiye nav krîzê. Gelên cîhanê jî berdelên van krîzan dide. Ji gelê Venezuelayê heta gelê Kurd û Filîstînê, li ser van gelan ji bilî şer û kuştinan tiştek bi xwe re nayîne. Hiqûqa navneteweyî pirr girîng e lê diyare ku hiqûqa navneteweyî tune ye û hiqûqa dewletan heye. Ev hiqûq jî mafên gelan naparêze û mudaxileyê nake. Me careke din ev yek dît. Lê hiqûqa navneteweyî divê li dijî binpêkrinên mafên mirovan mudaxileyê bike. Pêwîstî jî bi vê yekê heye. Pêdivî bi hêzeke enternasyonal heye.”
‘Hevdîtina HSDê û Şamê girîng e’
Sezaî Temellî bal kişand ser geşedanên li Îranê û wiha got: “Li Îranê jî taybet li herêma Rojhilatê Kurdistanê kuştinên faîl ne diyar pêk tên. Li Xezayê jî dîsa bi hiqûqa dewletan û li gor berjewendiyên wan tevgerek heye lê ne ji bo parastina mafên gelên li wir e. Li Sûriyê jî heman geşedan hene. Li Sûriyê jî divê hemû kes rêze ji mafên gelên Sûriyê re bigire. Sûriye dikare pêşeroja xwe bixwe diyar bike û pêwîstî jî bi hiqûqeke bi vî rengî heye. Em jî geşedanên li Sûriyê ji nêz ve dişopînin. Hevdîtinên di navbera Hezên Sûriyeya Demokratîk (HSD) û hikûmeta demkî ya Şamê de girîng in û daxwaza me jî ew e ku li gorî Peymana 10ê Adarê gav bên avêtin. Heke gel pêşeroja xwe bi xwe tayîn bike û ji rejîmên otorîter rizgar bibin, dikarin pêşî li mudaxileyên emperyalîst jî bigirin. Heke em dixwazin pêşî li mudaxileyên emperyalîst bigirin û hiqûqa navneteweyî pêk were divê di serî de rejîmên otorîter bi dawî bibin.”
‘Divê biryarên hiqûqa navneteweyî pêk werin’
Sezaî Temellî destnîşan kir ku divê hiqûqa navneteweyî li her derê pêk were û wiha axivî: “Divê biryarên ji bo Selahattîn Demîrtaş û girtiyên siyasî yên Doza Kumpasê ya Kobanê pêk were û werin berdan. Îstînaf biryarên hiqûqa navneteweyî binpê dike. Em bang li dadgehan dikin ku li gorî rêgezên mafên mirovan tevbigerin û van rêgezan pêk bînin.”
Sezaî Temellî têkidlarî xebatên Meclîsê û qanûnên hatine çêkirin jî ev yek anîn ziman: “Di sala 2025an de gelek pêşniyarên qanûnî bûn qanûn. Ev qanûn yek jî ne li gor pêdiviyên gel bûn. Gelek pirsgirêkên gel nehatin çareserkirin û bi van qanûnan pirsgirêk dijwartir bûn. Her wiha meaşê asgarî jî bi awayekî di bin sînorê birçîbûnê de hat diyarkirin. Kedkar û karker mehkûmî feqîriyê hatin kirin. Pakêta 11emîn a Darazê jî rê li pêşiya sûcên nû vedike û ev yek jî tevî îtîrazan derbas bû. Em hêvîdar in ku dê li Meclîsê pirsgirêkên gel werin çareserkirin.”
