Siyasetmedarê Kurd Ferîdun Yazar di salvegera 9emîn a wefata xwe de li ser gora xwe hate bibîranîn.
Endamê damezirîner ê Partiya Kedê ya Gel (HEP) û serokê wê yê giştî yê berê Ferîdun Yazar, di salvegera 9emîn wefata xwe de li ser gora xwe ji hêla malbat û hevrêyên xwe ve hate bibîranîn. Bîranîn li ser gora Yazar a li goristana gundê Ordekê yê navçeya Karakopru ya Rihayê hat lidarxistin. Endamên malbata Yazar, Cîgira Hevserokên Giştî yên Partiya Wekhevî û Demokrasiyê ya Gelan (DEM Partî) ya ji Komîsyona Gel û Baweriyan Berpirsyar Yuksel Mutlu, Hevberdevka Komîsyona Hiqûqê ya DEM Partiyê Sevda Çelîk Ozbîngol, wekîlên DEM Partiyê yên Rihayê Dîlan Kunt Ayan, Ferît Şenyaşar, Hevşaredarên Hewagê Îsmaîl Yildiz û Aygul Kapikayali, rêveberên DEM Partî û Partiya Herêmên Demokratîk (DBP), pêkhateyên Platforma Ked û Demokrasiyê ya Rihayê û gelek kes tev li bîranînê bûn.
Bîranîn bi rêzgirtinê dest pê kir. Piştre jî Hevserokê DEM Partiyê yê Rihayê Nîhat Demîrbîleklî axivî û got ku Ferîdun Yazar şoreşger bû û ev tişt anî ziman: “Ya dikeve ser milê me ew e ku em di rêya wî de bimeşin. Em îro li vir xemgîn in. Rêya wî rêya me ye. Em ê têkoşîna wan bi serkeftinê tacîdar bikin. Ev têkoşîn dê heta dawiyê bidome. Ji bo me nirxek bû. Pir zû koç kir. Ya ku dikeve ser milê me ew e ku em xeyal û hêviyên wî pêk bînin. Ew ê her tim di dilê me de bijî.”
Keça Ferîdun Yazar, Rahşan Yazar jî wiha got: “Jiyan ne tenê behstandin e. Pêşengên me jiyaneke birûmet hînî me kirin. Ji ber ku keça Ferîdun Yazar im, ez xwe bişens dibînim. Em ê di rêya wan de bimeşin.”
Piştî axaftinan, beşdaran çîçek danîn ser gora Yazar û dua kirin. Beşdar, piştre jî çûn serdana mala Yazar a li gund.
