Bi pêşengiya MEBYA-DER, Meclisa Ciwanan a DEM-Partî û Meclisa Ciwanan ên DBPê Nûreddîn Sofî, Koçero Ûrfa û Bahtiyar Gabar li navenda avahiya DEM Partiyê hatin bibîranîn û gotin: “Divê em xwedî li pêvajoya nû ya ku Rêberê Gelê Kurd Abdullah Ocalan daye destpêkirin derbikevin.”
Bi pêşengiya MEBYA-DER, Meclisa Ciwanan a Partiya Wekhevî û Demokrasiyê ya Gelan (DEM Partî), Meclisa Ciwanan ên Partiya Herêmên Demokratîk (DBP) Nûreddîn Sofî, Koçero Ûrfa û Bahtiyar Gabar li navenda avahiya DEM Partiyê ya navçeya Peyasê ya Amedê merasîma bîranînê li dar xistin. Di bîranînê de endamên Komeleya Dayikên Aştiyê, Komeleya Çand û Hunerê ya Dîcle û Firatê, Federasyona Komeleyên Hiqûqî û Hevgirtinê yên Malbatên Girtî û Hikumxwaran a Medê (MED-TUHAD-FED), Komeleya Alîkarî û Hevgirtina bi Malbatên Girtî û Hikumxwaran re (TUHAY-DER), rêxistinên navend û navçeyên derdorê ên DEM Partî û DBPê û endamên saziyên civaka sivîl beşdarî bîranînê bûn.
Salona bîranê bi wêneyên kesên ku jiyana xwe ji dest dane, bifindan û qurnefîlan hate xemilandin. Bîranîn bi deqeyek rêzgirtinê dest pê kir. Piştî rêzgirtinê sînevîzyon hate pêşandan. Girseya ku beşdar bibûn bênavber dirûşmeyên ‘Şehîd namirin’, ‘Bijî Serok Apo’ û ‘Ey şehîd xwîna te li erdê namîne’ berz kirin.
Hevseroka MEBYA-DERê Gurbet Sevîktek di bîranînê de anî ziman ku di vê têkoşînê de gelek kêliyên hestiyar hatine jiyîn û wiha got: “Kesên di têkoşîna azadiya Kurdistanê de jiyana xwe ji dest dane, têkoşîna wan gelekî mezin bûye. Em li vir banga xwedîderketina li pêvajoya nû ya ku Rêberê Gelê Kurd Abdullah Ocalan daye destpêkirin dikin. Divê em xwedî li pêvajoya nû derbikevin.”
Bîranîn bi çepik û berzkirina dirûşmeyan bi dawî bû.
