Komeleya Lêkolînên Çand, Dîrok û Wêjeya Devkî, heqaret û êrişa li ser Leyla Zana şermezar kir û êrişê wek êrişa li dijî aştiya civakî û wîjdana kolektîf a civakê pênase kir.
Komeleya Lêkolînên Çand, Dîrok û Wêjeya Devkî (SOZDER) têkildarî heqaret û nijadperestiya li dijî siyasetmedara Kurd Leyla Zana di maça Bursasporê û Somasporê de hatin kirin, bi daxuyaniyek nivîskî nerazîbûn nîşan da û êriş şermezar kir.
‘Ev ziman nikare wek rexne an azadiya derbirînê were hesibandin’
SOZDERê diyar kir ku ew gotinên nijadperest û zayendperest ên li dijî Leyla Zanayê hatine gotin şermezar dikin û wiha hate gotin: “Em bi tundî wan gotinên nemirovane, nijadperest û zayendperest ên li dijî Leyla Zanayê ku hatine gotin, şermezar dikin. Gotinên wiha ne tenê li dijî kesekî ne; ev li ser rûmeta mirovahiyê, aştiya civakî û wijdana me ya kolektîf êrîşeke eşkere ye. Leyla Zana ne tenê bi nasnameya xwe ya Kurdî kesayetiyeke siyasî ye; ew di heman demê de wekî dayik, zarok, xwişk û hevjînekê endameke birûmet a vê civakê ye. Heqaretên li hember wê ku tên kirin, berhema zihniyeteke ku ji mirovahî û exlaqê dûr e. Ev ziman nikare wek rexne an azadiya derbirînê were hesibandin.”
‘Divê her kes li dijî van êrişan helwesteke zelal û eşkere nîşan bide’
Di daxuyaniyê de hate diyarkirin ku nêzîkatiyek wiha ku nasnameya jinan dike armanc, tevahiya civakê birîndar dike û nayê qebûlkirin û ev yek hate gotin: “Em dixwazin tekez bikin ku ev êrîşên li dijî Leyla Zanayê di heman demê de nefreta li dijî hemû jinan û biçûkxistina wan e. Divê her kesê xwedî wijdan li dijî van êrîşan helwesteke zelal û eşkere nîşan bide. Wek endamên Komeleya Lêkolînên Çand, Dîrok û Wêjeya Devkî SOZDER, em nîjadperestî, zimanê zayendperest û gotinên ji nefretê tê avakirin red dikin û em van êrîşên gemarî ên li dijî Leyla Zanayê bi awayekî herî tund şermezar dikin. Bi rêzdarî ji raya giştî re radigihînin ku em ê parastina rûmeta mirovatiyê, wekhevî û rêzgirtinê bidomînin. Leyla Zana rûmeta me ye.”
