Mêrdîn – Hevserokê DEM Partiya Sêrtê Eşref Tekîn diyar kir ku xwedîderketina li Rojava xwedîderketina li nirxên gelê Kurd e û got: “Ji bo çareseriya alozî û krîzan divê demildest bi birêz Abdullah Ocalan û Rêveberiya Xweser re muzakere bên destpêkirin.”
Li ser Rojavayê Kurdistanê metirsiya êriş û komkujiyên ji hêla komên çekdar ve bên kirin, berdewam dike. Li dijî êriş û têkbirina destkeftiyên Rojava li ser sînorê Nisêbînê û Qamişlo û li ser sînorê Pirsûs û Kobanê nobetên xwedîderketinê berdewam dikin. Nobeta li Nisêbînê di roja 16emîn de berdewam dike û nobeta li Pirsûsê jî di roja 6emîn de didome.
Her roj rêveberên partiyên DBPê û DEM Partiyê, nûnerên rêxistinên sivîl û xelk ji hin navçe û bajarên Bakurê Kurdistanê diçe serdana çalakiyê ango nobetên li ser sînor. Rêxistinên DBPê û DEM Partiyê yên bajarê Sêrtê jî 26ê mehê li Nisêbînê piştevaniya çalakiyê kirin û peyama piştevaniya bi Rojava re dan.
Hevserokê DEM Partiyê yê Sêrtê Eşref Tekîn ku di nav şandeyê de serdana çalakiyê kir, têkildarî geşedanên li Rojava û nobetê ji Ajansa Welat re axivî.
‘Divê statuya Rojava were pejirandin’
Eşref Tekîn diyar kir ku bi taybetî dema ew li rewşa Rojava dinêrin, destkeftiyên gelê Kurd ji aliyê pergalên hegemonîk ve nayên pejirandin û wiha got: “Lê belê di van deh salên bihurî de gelê Kurd bi têkoşîn û berxwedana xwe, bi ked û xwîna xwe ev destkeftî bi dest xistin. Mineta wan bi kesî tune ye. Em niha ji bo êrişên li ser Rojava li sînorê Qamişlo û Nisêbînê ne, em dibêjin tu ferqa Qamişlo û Nisêbînê, tu ferqa Kobanê û Sêrtê, tu ferqa Dêrikê û Batmanê ji hev nîn e. Em bi vî rengî lê dinêrin. Ya rastî em dişopînin, dewletên cihanê piranî dibêjin mafê gelê Kurd e ku bi destkeftiyên xwe li ser axa xwe bijîn lê dixwazin pergaleke li gorî xwe ava bikin. Teklîfên cuda cuda ji gelê me yê Rojava re tên kirin. Lê min berê jî got, mineta gelê me bi kesî nîn e, bi têkoşîna xwe, bi hêza xwe hatiye van rojan. Mafê gelê me ye ku bi zimanê xwe, bi çanda xwe li ser axa xwe bi awayekî azad bijî. Daxwaza gelê me yê Rojava jî ev e. Vêya ne tenê ji bo xwe, ji bo hemû gelên din ên li Rojava dijîn jî dixwaze. Ev daxwazeke pir di cih de ye û rewa ye. Em dibêjin pêwîste di serî de rêvebariya nû ya Şamê û hemû dewletên cihanê vê daxwaza gelê Kurd qebûl bikin. Statuya gelê Kurd li Rojava wê were qebûlkirin. Ji bilî vê jî tu rê nîn e.”
‘Em xebatên yekitiya li Rojava bi nirx dibînin’
Eşref Tekîn da zanîn ku gelê Kurd daxwaza mîsogeriya statuya xwe dike û got: “Hemû hêzên îro ku êrişî Rojava dikin jî statuya gelê Kurd qebûl nakin. Ji ber vê em encax bi tifaq û yekitiyê, bi xurtkirina hêza xwe dikarin li dijî van êrişan bisekinin. Em van hewldan û xebatên partî û saziyên Rojava yên ji bo yekitiyê bi nirx dibînin. Em hêvî dikin rojek berî rojekê ev tifaq û yekitî xurttir bibe. Pêwist e heyeteke hevpar ku ji hemû partî û saziyên Kurdistanî biçe Şamê, ev daxwazeke di cih de ye, lazime demildest ev heyet bê avakirin. Hevdîtin û muzakere bi rêveberiya nû ya Şamê re werin kirin û di pergala nû ya Suriyê de gelê Kurd jî were naskirin. Çand, ziman û satatuya wî were qebûlkirin û bi statuya xwe bijî. HSD û Rêveberiya Xweser her tim ji dîyalogê, muzakereyê re amade ne. Ev jî tiştekî bi nirx e.”
‘Tirkiyeyê guhê ji bangawaziya Rojava re girtî ye’
Eşref Tekîn anî ziman ku şandeya dewleta Tirk çû Şamê bi rêveberiya nû re hevdîtin kir û wiha domand: “Lê bi salan e dewleta Tirk guhê xwe ji bangewaziya bi milyonan gelê Kurd û Rêveberiya Xweser re girtiye. Ev nêzikatiya şaş e, em dibêjin çawa ku Koalîsyona Navneteweyî bi Rêveberiya Xweser re hevdîtinan dike lazim e dewleta Tirk jî bi Rêveberiya Xweser re hevdîtinan bike, diyalog û muzakereyê esas bigire. Ya din jî heke em behsa aşitî û aramiyê bikin em nikarin Tirkiyeyê, Bakur û Rojava ji hev cuda bigirin dest. Li vir aştî û aramî çêbibe li wir çênebe tu wateya xwe nîn e. Yan jî li Rojava çêbibe li vir çênebe dîsa zêde wateya xwe nîn e.”
‘Divê demildest bi birêz Abdullah Ocalan re hevdîtin bê kirin’
Eşref Tekîn destnîşan kir ku ji ber krîz û aloziyên li Tirkiyeyê û Sûriyeyê ew dibêjin lazim e demildest di serî de bi Rêberê PKKê Abdullah Ocalan re, bi DEM Partiyê re, bi îradeya gelê Kurd ya Rojava re pêvajoyake muzakereyê bê destpêkirin û gotinên xwe wiha bi dawî kir: “Heke muzakere pêk werin, dê ev pêvajo bi çareseriyeke mayînde bi encam bibe. Em vê banga xwe dubare dikin. Lê belê dema em li gotin û kirinên dewleta Tirk, hukumeta AKP-MHPê dinêrin em ji dil nabînin. Bangewazî hene em van binirx dibînin, lê di qadê de em encamên vê nabînin. Lê em dibêjin gelê Kurd gelekî xwedî dîrokeke qedîm e, xwedî çand û ziman e, lazim e hemû dewlet vê rastiyê bibînin û qebûl bikin. Di serî de jî dewleta Tirk vêya qebûl bike. Ji bo aştî, demokrasî û aramiyê ev yek ferz e. Lazim e di nav gelan de aştî pêk were, daxwaza me ev e.”
