Amed – Hevşaredarê Wanê Abdullah Zeydan diyar kir ku divê dewlet ji aliyê “mafê hêviyê” gav biavêje û got: “Divê şert û mercên birêz Abdullah Ocalan werin guherandin ku pêvajo bi rê ve biçe.”
Partiya Demokrasî û Wekheviyê ya Gelan (DEM Partî) li Navenda Kongreyê ya ÇandAmedê civîna xwe ya rêveberiya xwecihî li dar xist. Hevşaredarên DEM Partiyê tev li civîne bûn. Hevşeraderê Bajarê Mezin a Wanê Abdullah Zeydan ku tev li civînê bû derheqê pêvajoyê de ji Ajansa Welat re axivî.
‘Pêwîste dewlet jî bi awayekî cidî nêzî pêvajoyê bibe’
Abdullah Zeydan bi bîr xist ku di 27ê Sibatê de Rêberê Gelê Kurd Abdullah Ocalan bangawaziyek dîrokî kir û wiha got: “Ev bangawaziya birêz Abdullah Ocalan ji bo gelê Kurd, Tirk, û Ereb bû. Ev bang ji bo gelên Rojhilata Navîn firsendekê dîrokî derxist holê. Hem birêz Abdullah Ocalan hem jî Tevgara Azadiyê bi awayekî cidî nêzî vê pêvajoyê dibe. Gelê Kurd û gelên aştîxwaz jî xwedî li bangwaziya birêz Abdullah Ocalan derketin. Em bawer in ku dewlet jî bi awayekî cidî nêzî pêvajoyê bibe û gav biavejê. Li gelek bajaran vîna gelê Kurd hatiye desteserkirin. Yek ji wan bajaran jî bajarê Wanê bû. Tayînkirina qeyîm êriş e û ev êriş li dijî demokrasiyê ye. Em wekî Hevşaredarên Wanê vê êrişê qebûl nakin. Daxwaza me ew e ku divê dewlet jî li gorî ruhê pêvajoyê gav biavêje. Yek ji wan gavan paşve kişandina qeyiman e. Divê demildest vîna gelê Kurd were paşde were teslîmkirin. Qeyim li ser vîna gelê Kurd heqaret û talan e.”
‘Divê şertên birêz Ocalan werin guherandin’
Abdullah Zeydan destnîşan kir ku divê desthilat berpirsiyariya xwe ya li ser pêvajoyê bicih bîne û got: “Divê biryarên Dadgeha Mafên Mirovan a Ewropayê werin qebûlkirin. Yek jî wan biryaran jî ‘mafê hêviyê’ ye. Divê ji aliyê ‘mafê hêviyê’ ve gav bên avêtin. Divê şert û mercên birêz Abdullah Ocalan werin guherandin ku pêvajo bi rê ve biçe. Biryarên DMMê wekî din jî hebûn. Divê biryara li ser Fîgen Yuksekdag û Selahattîn Demîrtaş jî were pejirandin. Îro di girtîgehan de gelek girtî hene divê ew tevahî bên berdan. Yek din jî divê dewlet nêzikbûna xwe ya Rovaja biguherîne. Heke yekîtiya gelan pêk were dê pêvajo bi ser bikeve.”
