Parlamenterê DEM Partiyê Mehmet Kamaç li ser navê Tifaqa Kurdistanî axivî û got: “Wê Newroza 2025an bibe Newroza azadiyê û serkeftinê.”
Newroza îsal bi şiyara “Rêbertiya Azad, Civaka Demokratîk” ji hêla DEM Partî, DBP û TJAyê ve tê lidarxistin. Pîrozbahî bi hemû coş û kêlecanê berdawam dike. Li ser navê Tifaqa Kurdistanê parlamenterê DEM Partiyê yê Amedê Mehmet Kamaç derket ser dikê û axivî.
Axaftina Mehmet Kamaç wiha ye: “Ameda regnîn, paytexta Kurdistanê, keleha berxwedanê Newroza te pîroz be. Bi taybetî hemû mêvanên ji çar aliyên Kurdistanê û Rjhilata Navîn bi xêr hatine.
Newroza 2025an wê bibe Newroza azadiyê
Dema dîroka Newrozê tê gotin; Kawayê Hesinkar tê bîra mirov. Kawayê Hesinkar li dijî zilma Dehaq agirê serkeftinê û azadiyê pêxist. Îbrahîm pêxember li dijî Nemrûdê zalim têkoşîna azadiyê da. Mûsa li dijî Fîrewnê zalim têkoşîna azadiyê da. Îro miletê Kurd li çar aliyên Kurdistanê li dijî zalimên hemdem têkoşîna azadiyê dide. Roj bi roj agirê Newrozê bilind bûye. Newroza 2025an ji bo miletê Kurd wê bibe Newroza azadiyê û serkeftinê.
Têkoşîna Kawayê Hemdem dê bi ser bikeve
Em hemû miletek in, Çi Mahamabad, çi Hewler, çi Qamişlo û çi Amed, em hemû welatek in. Çi Soranî, Goranî, Kurmancî û Zazakî em hemû zimanek in. Bi hezar salan e qedexeya li ser ziman û nasnameya gelê Kurd heye. Înkar û tunehesibandin li ser gelê Kurd didome. Lê vaye li vê qadê binerin gelê Kurd ji dest ji daxwaza xwe bernade. Gelo kî dîtiye ku zimanê miletekî di mizgefta wan de hatibe qedexekirin? Têkoşîna gelê Kurd têkoşînek pîroz e. Cudabûna reng û zimanê we ji ayetên xweda ne. Bi salan e li Amedê li mizgeftan bi zimanê xwe dînî xwe hîn bibe. Ji bo vê yekê têkoşîna azadiyê ya bi Kawayê Hemdem dest pê kiriye wê bi ser bikeve.
Em banga birêz Ocalan bigihînin serkeftinê
Di 27ê Sibatê de birêz Abdullah Ocalan daxwaza aştiyek mayînde û bi rûmet kir. Em jî dibêjin, vê peyama sedsalî vala nehêlin. Viya hêvaiya baweriyê ye. Viya hêviya jiyanê ye. Viya hêviya wekhevî û biratiyê ye. Ji bo vê peyama dîrokî divê demildest gav bên avêtin. Bila li vî welatî her kes bi reng û zimanê xwe azad bijîn. Em li ser navê Tifaqa Kurdistanê silavên xwe ji we hemûyan re pêşkêş dikin û Newroza îsal newroza azadiyê û serkeftinê ye.”
Nameya girtiyan hat xwendin
Piştî axaftina Kamaç, nameya ku girtiyên ji zindanan şandiye hat xwendin. Girtiyan Newrozê li gelê Kurd pîroz kirin û di nameyê de bal kişandin ser banga dîrokî ya Rêberê Gelê Kurd Abdullah Ocalan.
