TJA, DBP û DEM Partiyê, jinên siyasetmedar Sêvê Demîr, Pakize Nayir, Fatma Uyar, Sakîne Cansiz, Leyla Şaylemez, Fîdan Dogan û Evîn Goyî yên di demên cuda de li Sîlopîya û Parîsê hatin kuştin, li navçeya Silopiyayê bi bîr anîn.
Li navçeya Silopiyayê ya Şirnexê di salên 2015 û 2016 de, qedexeya derve hatibû îlankirin. Di qedexeya derve de, endam Meclisa Partiya Herêmên Demokratîk (DBP) Sêvê Demîr, Hevseroka Meclisa Gel ya Silopiyayê Pakize Nayir û Endama Kongreya Jinên Azad (KJA) Fatma Uyar di 4ê Çileya 2016an de ji aliyê polîsan ve hatin kuştin. Her 3 siyasetmedarên jin di 9emîn salvegera kuştina xwe de li navçeya Silopiyayê hatin bi bîranîn. Siyasetmedarên jin Sakîne Cansiz, Leyla Şaylemez, Fîdan Dogan, Evîn Goyî yên li Parîsê hatibûn kuştin jî hatin bibîrnaîn. Bernameya bîranînê li eywana konferansê ya Partiya Wekhevî û Demokrasiyê ya Gelan (DEM Partî) a navçeya Silopiyayê pêk hat. Meclîsa Dayikên Aştiyê, aktivîstên Tevgera Jinên Azad (TJA), rêxistinên Partiya Herêmên Demokratîk (DBP) û DEM Partî yên navçe û navenda Şirnexê, Berdevka Meclîsa Jinan a DEM Partî Halîde Turkoglu, parlamentera DEM Partî ya Şirnexê Newroz Uysal Aslan û gelek kes tevlî bûn. Girseyê di bîranînê de wêneyên jinên hatinê kuştin rêz kirin, qûrnefîl danîn û find vêxistin. Bernamê bi temaşêkirina sînevîzyona qala têkoşîna jinên hatinê kuştin dike dest pêkir. Piştî sînevîzyonê girseyê bi yek dengî dirûşmeyên, “Şehîd namirin” û “Jin jiyan azadî” berz kirin.
‘Em ê azadiyê bînin vî welatî’
Piştrê jî malbatên her 3 jinên hatinê kuştin derketin ser dîke. Li ser navê malbatan dayika Sevê Demîr Sakîne Demîr axivî. Sakîne Demîr, ji Rêberê PKKê Abdullah Ocalan re silavên xwe şandin û got: “Hemû şehîdan bibîrtînin. Em dibêjin yekitî. Ez bawerim em ê azadiyê bînin vî welatî. Ez bawerim deriyên zindanan jî vêbibin û jinê jî azad bin. Ez ji Kurdistana azad re serkeftinê dixwazin. Em bang li rayedarên dewletê dikin ku vê firsenda aştiyê ji destê xwe bernedin. Birêz Abdullah Ocalan rêberê gelan e. Em dibêjin bes e. Dest ji înakrê berdin. Girtiyên zindanan berdin. Bijî serkêftin û bijî azadî. Bijî yekitiya gelê Kurd.”
‘Em têkoşînê mezin bikin’
Halîde Turkoglu, bi lêv kir ku 9 sal berê 3 siyasetmedarên jin li vir hatin kuştin û got: “Ji ber ku mafê xwe diparastin û jin bûn hatin kuştin. Em di şaxsê van hevalan de jinên hatinê kuştin bibîr tînin. Dema em hevalên xwe bibîrtînin jî em hesab ji kujeran dipirsin. Her bibîranîn ji bo me mezinkirina têkoşînê û hesap pirsînê ye. Desthilat dê hesabê kuştinê bide. Hevalên me nişan dan ku her berdel têkoşîna me mezin dike. Îro bi hezaran Sêvê, Fatma, Pakize û Sakîne hene. Îro ev têkoşîn jinan û gelê Kurd mezin dike. Yên komkujî kirin niha jî êrişî Rojava dikin. Em şoreşa jinan a Rojava jî silav dikin. Ji bo pirsgirêka Kurd bi awayekî demokratik bê çareserkirin edî roj roja azadiya fizîkî ya Birêz Abdullah Ocalan e. Heta azadiya birêz Abdullah Ocalan pêk neyê aştî jî pêk nayê. Em ê têkoşîna xwe mezin bikin. Em sozê didin hevalên xwe. Divê em Rojava biparêzin. Wan xwest em çong dînin, lê em soz didin ku çi dikin bila bikin em ê têkoşîna azadiyê ya hevalên xwe mezin bikin û çi berdel hebe em amade ne. Em ê bi serbikevin.”
Piştî axaftinan mevlîd dan û dê bername bi serdana goristanê ya li Şirnexê bi dawî bibe.
