Tevgera Jinên Azad (TJA) Rahşan Demîrel a di Newrozê de bedena xwe şewitandibû, li ser gora wê bibîr anî. Dayika Rahşan Demîrelê Emîne Demîrel got: “Ew ji bo azadiya gelê Kurd têkoşiya û serî netewand.”
Di salên 1990î de artêşa tirk li dijî gelê kurd gelek komkujî pêk anî. Rahşan Demîrel li dijî van komkujiyan li Kadîfekale ya Îzmîrê bedena xwe şewitandç Tevgera Jinên Azad (TJA) ji bo Rahşan Demîrel bibîr bîne, li ser gora wê kom bûn û daxuyanî dan. Nûnertiyên partiyên siyasî û rêxistinên civaka sivîl, malbata Rahşan Demîrel û gelek welatî tev li merasîma bîranînê bûn. Girseya ku di têketina Goristana Hecaceyê ya li navçeya Nisêbînê hate gel hev, dirûşmên “Şehîd namirin” û “Bijî Serok Apo” berz kirin û heta gora Rahşan Demîrelê meşiyan. Girseyê ji ewil çîçek danîn ser gora Rahşan Demîrel û piştre jî dayika wê Emîne Demîrel axivî. Emîne Demîrel, diyar kir ku keça wê xwe ji bo gelê Kurd û jinên Kurd feda kiriye û ev tişt anî ziman: “Beriya çalakiya xwe gelek caran dirûşma ‘Bijî Serok Apo’ berz kir. Xwedê emrekî dirêj bi nesîbê Serokê me bike da ku vî gelî rizgar bike. Dema Rahşanan, Mazluman, lehengan, dema we tevan canê xwe dida we got ‘Bijî Serok Apo’. We tevan got ‘Bijî azadî’. Li dijî Kurdan zilm û komkujiyên gelek mezin hatin kirin. Têkoşiyan û serî netewandin. Xwe avêtin bin panzeran, singê xwe dan dîwarên zindanan, girtîgeh veguherandin kelehên berxwedanê. Serî netewandin. Ez jineke Kurd im. Ez siyasetmedar nînim, oldar im, birîndar im. Ez jinek im ku ji dilê min xwîn diherike. Dema dibêjin Newroz, mîna volkanan dikelim.”
‘Bibin yek’
Emîne Demîrel, anî ziman ku ji bo gelê Kurd sedsalek li paş maye lê sedsaleke nû dest pê dike û got: “Rêbertiya me di vê sedsalê de destê xwe bilind kir û aştî ragihand. Erk û berpirsyartiyek xist ser milê Kurdan. Ez bangî malbatên ku tu kesî qîmet nedayê, tu kesî bi qedrê wan nezanî, yên li ber deriyên girtîgehan sekinîn û dema cenazeyên xwe defin dikirin digotin ‘Bijî Serok Apo’ dikim; bibin yek, peywira me mezin e û biqîmet e. Îro, roja man û nemanê ye. Aqilê xwe bînin serê xwe û baş bixwînin. Dev ji hesabên biçûk berdin. Îro, roja man û nemanê ya Kurdan e. Em ê bi hev re bi destê Apo (Abdullah Ocalan) bigirin û mîna stûneke ji pola bilind bikin. Em ê hêzê bidin ku bikare azadiyê bîne û dinya qedrê wî bizane. Qewet, ji yekitiyê dibe.”
Emîne Demîrel, bang li gelan kir û wiha pê de çû: “Azadiya Serok ji bo hemûyan derman e. Mîna ku 40 salan mirov birîndarekî derman bike, muayene bike û dîsa rake ser pêyan e. Tê wateya rakirina ser pêyan a gelê bindest e. Ev, felsefeya wî ye. Êdî dema me hat, rûpelên dîrokê ji bo me vebûn. Werin em bi hev re destê Serok Apo xurt bikin.”
