Serokê DYAyê Donald Trump, derbarê êrişên li ser Îranê de daxuyaniyek da û got: “Pêla mezin hê nehatiye. Ew nêzîk dibe.”
Donald Trump, ji bo êrişên ku bi Îsraîlê re li dijî Îranê dane destpêkirin, ji televîzyona CNNê re axivî. Trump îdia kir ku artêşa DYAyê Îran “bi erdê re kirine yek”, lê destnîşan kir ku “pêla mezin” hê nehatiye û bi vî rengî nîşan da ku dê êrişên hîn mezintir pêk werin.
‘Ez naxwazim şer pir dirêj bikişîne’
Tump diyar kir ku şer heta niha li gor planlama wan dimeşe û ev tişt gotin: “Bi dîtina min pir baş diçe. Pir bi hêz e. Artêşa herî mezin a cîhanê di destê me de ye û em wê bi kar tînin. Ez naxwazim (şer) pir dirêj bikişîne. Min her tim bawer dikir ku dê çar hefteyan bikişîne. Em hinekî ji plana xwe pêşdetir in.”
‘Pêla mezin ya êrişan hê nehatiye’
Trump di berdewamiya axaftina xwe de îdia kir ku DYA ji bo ku gelê Îranê kontrola welatê xwe ji rejîme bigire gelek tiştan dike wiha pê de çû: “Belê, DYA ji bilî êrîşa leşkerî, ji bo ku gelê Îranê kontrola welatê xwe ji rejimê bistîne, hîn bêtir tiştan dike. Lê niha em dixwazin her kes di hundur de bimîne. Derve ne ewle ye û dê hîn bêewletir bibe. Me hîna bi tundî li wan nexistiye. Pêla mezin hê nehatiye, nêzîk e.”
‘Em Nizanin ka kî Îranê birêve dibe’
Trump diyar kir ku gefa nukleerî ya Îranê ev demeke dirêj e li herêmê “pirsgirêkeke” mezin e û wiha berdewam kir: “Divê hûn fêm bikin, bi salan di bin ewrekî tarî de jiyan. Ji ber wê qet aştî çênedibû. Em nizanin serokatî kî ye. Em nizanin dê kê hilbijêrin. Belkî bi şans bin û yekî ku dizane çi dike bibînin. Îranî ji ber êrişên pêşîn, ji aliyê serokatiyê ve gelek tişt winda kirin. Çil û neh kes (hejmara rayedarên payebilind ên Îranî yên hatine kuştin). Êrişeke pêbawer bû. Pê hesiyan ku nayên tespîtkirin, lê ne wusa bû. Niha ew bi xwe jî nizanin ka kî wan birêve dibe.”
Trump her wiha got ku Îranê bi ti awayî rawestandina dewlemendkirina uranyumê qebûl nekiriye û ev êrîş rêya herî rast e ji bo sekinandina wan.
