Şirnex – Fermandariya Cendirmeyan a Şirnexê bi îmhakirina amûrên leşkerî zerarek mezin dide xwezayê.
Li Şirnexê ji aliyê Fermandariya Cendirmeyan a Şirnexê ve di 9ê Mijdarê de daxuyaniyek hat dayîn û li gorî vê daxuyaniyê hat eşkerekirin ku hin amûrên leşkerî dê li Herêma Deriyê Dolê ku dikeve navbera gundê Divin û Cifanê yên li Çiyayê Cûdî werin îmhakirin. Her wiha ev herêm heya 18ê Mijdarê jî ji bo çûnehata sivîlan hatiye qedexekirin.
Piştî îmhakirina teqemeniya agir bi daristanê ket
Piştî daxuyaniyê di 11ê Mijdarê de li Herêma Deriyê Dolê hin amûrên leşkerî hatin îmhakirin û di encama vê îmhakirinê de li herêmê agir bi daristanê ket. Di encama şewata derketî de qadek fireh şewitî û ji ber di dema teqînê de ewlehiya hewce dike nehatibû stendin piştî saetan mudaxile hate kirin.
Destûr nedan welatiyên herêmê agir vemirînin
Li gorî agahiyên ji çavkaniyên pêbawer hatine bidestxistin, gundiyên derdorê ku dîtin agir bi daristanê ketiye xwestin agir vemirînin lê ji aliyê leşkeran ve hatin astengkirin û destûra wan nehat dayîn biçin mudaxile li şewatê bikin.
Dîsa di çarçoveya îmhakirina amûrên leşkerî de di 13ê Mijdarê de teqînek mezin pêk hat û dûxana ji vê teqînê belav bû ji her aliyê navenda Şirnex ve hat dîtin.
Li gor agahiyên çavkaniyên herêmî dan; ev amûrên leşkerî ku tên îmhakirin ên di demên cuda de di operasyonan de hatine bidestxistin.
Li gorî qanûnan sûc e
Ev îmhakirina amûrên leşlerî derveyî qanûnên Wezareta Hawirdor û Wezareta Daristan û Çandiniyê yên xwezaparastinê ne. Her wiha li gor rêgezên Hêzên Çekdar ên Tirk (TSK) jî îmhakirina van teqemeniya sûc e lê dîsa jî dema mijar parastina xwezaya Kurdistanê be leşker guh nadin tu qanûnan.
