Cerdevanên ji gundê Şerefiyê li Çiyayê Gabarê bi destûra Gerînendetiya Daristan û Çandiniyê talanê dikin. Çavkaniyên pê bawer diyar kirin ku gerînende bertîlê ji cerdevanan distîne.
Ji sala 2019an heya niha bi mîlyonan darên li daristanên Şirnexê bi şirîkatiya hêzên dewletê û bi destê cerdevan û kesên alîgirê dewletê tên birîn. Her roj dîmenên talana daristanên Herêma Besta, Çiyayên Cûdî û Gabarê digêhin ber destê Çapemeniya Azad. Ji destpêka talana daristanan heya niha bi sedan nûçe ji aliyê Çapemeniya Azad ve hatine çêkirin lê her roja diçe talana xwezaya Şirnexê dijwartir dibe.
Dîmenên ku duh ji aliyê çavkaniyên ji herêmê hatin ber destê me, yên gundê Şerefiyê yên Herêma Haranê ya Şirnexê ne. Di dîmenan de xuya dike ku çend kes bi traktoran ketine nav daristanê û talanê dikin.
Çîrok anku dîmenên duh ji aliyê hin çavkaniyên ji herêmê hatine ber destê me bi serê xwe nûçeyeke cûda ye. Lê weke Ajansa Welat em dixwazin çîroka dîmenan, ka çawa ji aliyê çavkaniyan ve hatine ber destê me, ji xwînerên xwe û xwezaparêzan re ragihînin. Ev çavkaniyê ku bi xwe xwezaparêz e beriya ku dîmenan ji me re bişîne destpêkê dibêje, ‘Ji ber ewlehiya min divê teqez hûn navê min nedin’ û piştre dîmen û wêneyên talanê dişîne. Çavkaniyên ku dibin şahidê talanê van talanker û kesên destûrê didin wan baş nas dikin. Her wiha di talana daristanan de lîstikên çawa tên lîstin jî baş dizanin. Lê ji ber ewlehiya xwe naxwazin ev agahî werin parvekirin.
Li Gabarê kî, çawa talanê dike?
Li gor lêkolînên me û agahiyên çavkaniyên me dane, li gundê Şerefiyê cerdevanê berê ku niha teqawît bûye Bahattîn Vûral û cerdevanên bi navê Mahmût Vûral û Mehmet Nûrî Vûral ji bo birrîna daran ku dibêjin ‘erdê me yê bi tapû ye’ serî li Gerînendeya Daristan û Çandiniyê ya Şirnexê didin. Li ser vê daxwaza cerdevanan Gerînendetiya Daristan û Çandiniyê ya Şirnexê destûra mehekî (30 roj) ji bo birrîna daran dide van kesan. Piştî destûr hatiye stendin van cerdevanan karkerên birrîna daristanan dîtine û duh dest bi talanê kirine.
Gerînendetiya Daristanan bertîlê distîne!
Li gor agahiyên hatine bidestxistin ev her sê cerdevan di heman demê de weke axayên gund in û erdê ku dibêjin ê me ye, erdê şêniyên gund ên salên 90î koçî metropolan kirine ye. Lê ev kes hêza dewletê didin pişta xwe û talanê li ser van erdan dikin. Her wiha bertîlek baş didin kesên di Gerînendetiya Daristan û Çandiniyê de dixebitin û bi vî awayî karê xwe rêve dibin.
Gerînendetiya Daristan û Çandiniyê: Me destûr daye
Bi rêya telefonê me xwe gihand rayedarên Gerînendetiya Daristan û Çandiniyê ya Şirnexê û pirsa, ‘We destûra birrîna daristanên gundê Şerefiyê daye’ kir. Rayedaran pirsa me bi erênî bersivand û gotin wan bi rêyên fermî destûra vê yekê daye.
