Şirnex- Leşkeran li Şirnexê ji bo 30ê tebaxê di nava kolanan de bi çekan geriyan û zarok tevlî merasîma leşkerî kirin.
Dewlet ji bo serwerhiya xwe nîşan bide, tundiya leşkerî derdixe pêş. Di pîrozbahiya 30 tebaxê de li Şirnexê ev şênber bû. Di salên dawîn de bi taybetî li Botanê dewlet di merasîma 30ê tebaxê de zarokan wekî amûr bikar tîne. Berê ev merasim tenê ji aliyê hêzên leşkerî ve pêk dihat. Lê niha di van merasîman de êdî zarokan jî bikar tînin.
Berê tenê li baregehên xwe merasîm li dar dixistin
Dewlet li gelek bajarên Bakûrê Kurdistanê bi boneya,’serkeftina 30 tebaxê’ merasîman li dar dixe. Berê merasîm tenê li baregehên xwe pêk dianîn. Lê piştî 2016an û virde merasîman di nava kolanan de pêk tînin. Bi taybetî li Şirnexê kolan bi kolan digerin. Bi vê yekê hewl didin ku bi çek û amûrên xwe yên şer zarok, jin, ciwan û gelê li kolanan çavtirsandî bikin.
Zarokan dikin amûr
Ji bilî meşa leşker û polîsan a bi çek, wesayîtên leşkerî yên şer jî tevlî van merasîma dikin. Di 17 salên dawî de ev maşîneyên leşkerî dema di nava bajêr de derbas dikirin, nêzî 100 qeza pêk hatin. Di qezayan de 20 jê zarok zêdetirî 40 kes mirin. Li gel vê yekê jî dewletê û hêzên leşkeri aqil ji van qezayan nagirin û van wesayîtên leşkerî di van merasîma de bikar tînin.
Zarokan derdixin pêş
Di dîmenên provaya ‘pîrozbahiya 30ê tebaxê ya îsal de dîsa zarokên Şirnexê bikar anîn. Di bernameya ku li navenda Şirnexê pêk hat de dîmen hatin parvekirin û di van dîmenan de yên ku dane herî pêş zarok in. Zarokên ku hewceye ji amûrên leşkeri dûr werin xistin bi deste hêzên leşkeri têxin nava merasîmên leşkerî yên bi çek.
