Amed – Endamê Koma Aştiyê siyasetmedar Mehmet Şîrîn Tûnç diyar kir ku hêzên navneteweyî bi komploya 15ê Sibatê xwestine di şexsê Rêberê Gelê Kurd Abdullah Ocalan de Tevgera Azadiyê û tevgera Kurdan tevahî ji holê rakin.
Hêzên hegemon li dijî Rêberê Gelê Kurd Abdullah Ocalan plansaziya komployekê çêkirin. Ji ber komploya navdewletî ku rola gelek dewletan di nav de hebû Abdullah Ocalan di 9ê Cotmeha 1998an de ji Sûriyeyê hat derxistin û berê wî dan Ewropayê. Piştî 130 rojan di 15ê Sibata 1999an de ji aliyê hêzên navdewletî ve di encama komployekê de li Kenyayê hat girtin û radestî Tirkiyeyê hat kirin. Abdullah Ocalan tevî ku 27 sal in li Girtîgeha Îmraliyê di nav tecrîd û îzolasyoneke dijwar de tê ragirtin jî bi berxwedan û têkoşîna xwe ya ji bo mayîndekirina aştî, azadî û demokrasiyê li tevahiya Rojhilata Navîn û cîhanê deng vedaye, komploya li dijî xwe pûç kir. Salek e Abdullah Ocalan pêvajoya Aştî û Civaka Demokratîk daye destpêkirin û tevî hemû astengî û tengasiyan jî ji bo parastina nirxên mirovahiyê û aştiya civakî bi israr têkoşîna xwe didomîne.
Endamê Koma Aştiyê siyasetmedar Mehmet Şîrîn Tûnç têkîldarî salvegera komploya 15ê Sibatê ji Ajansa Welat (AW) re axivî.
‘Armanca komployê têkbirina Tevgera Azadiyê bû’
Mehmet Şîrîn Tûnç da zanîn ku komploya navneteweyî, bi taybetî komployeke pirr berfireh bû û armanc têkbirina tevger û berxwedana gelê Kurd bû û wiha got: “Di vê komployê de hêzên navneteweyî dixwestin, di şexsiyeta Serokê Gelê Kurd de, Tevgera Azadiyê, tevgera Kurdan bi tevahî ji holê rakin. Berî wê, Amerîkayê, hêzên ji Başûrê Kurdistanê bi taybetî birêz Mam Celal û Mesûd Barzanî birin Washingtonê, bi wan re hevdîtin kir. Li hemberî çapemeniya tevahiya cîhanê destê Barzanî û Talabanî dan ser hev. Bi vê peyamê Amerîkayê got, ‘Serokê Kurdan hûn in û em ê Ocalan û PKKê tasfiye bikin’. Wezîrê Karên Derve yê Amerîkayê yê çaxî ev tişt anî ziman, ‘Di nava şeş mehan de PKKê wê bi tevahî ji holê were rakirin û em ê wan tune bikin’. Bi vî şiklî ev komploya navneteweyî li ser Serokê Gelê Kurd hate destpêkirin.”
‘Li dijî hêzên hegemon paradîgmayek nû’
Mehmet Şîrîn Tûnç diyar kir ku bi vê komployê di şexsiyeta Rêberê Gelê Kurd de, li cîhanê metrekareyek ax ji bo Kurdan hatiye qedexekirin û wiha dirêjî da axaftina xwe: “Hêzên hegemon bi vê komployê xwest ku ji Serokê Gelê Kurd û gelê Kurd re li ser rûyê cîhanê metrekareyek ax qedexe bikin. Serokê Gelê Kurd ji berê ve ev tişt digot, ‘Xwesteka min ew e ez biratiya gelê Kurd, aştiya gelê Kurd û Tirk bidim çêkirin’. Di netîceyê de di wê darizandina Girava Îmraliyê de Serokê Kurd parastina xwe, berfireh li ser vê mijarê meşand û bi vî şiklî jî Komara Demokratîk divê çawa were çêkirin, çawa di pratîkê de were pêkanîn, ji nû ve paradîgmayeke îdeolojîk derxist.”
‘Kurdan got hûn nikarin roja me tarî bikin’
Mehmet Şîrîn Tûnç destnîşan kir ku 27 sal berê, dema komplo li dijî Serokê Gelê Kurd hate meşandin, wê çaxê Gelê Kurd ketibû nav tevger û lêgerînê û wiha got: “Dema Rêberê Gelê Kurd hat ragirtin, xwedîderketinek çêbû. Çalakiyên mezin hatin lidarxistin. Ji 80 hevalan zêdetir canê xwe dan ber agir û gotin ‘Hûn nikarin roja me tarî bikin’. Dengê gelê Kurd li her derê belav bû û li derdora Serokê Gelê Kurd hevgirtineke mezin ava bû.”
‘Divê demildest kongreya neteweyî were lidarxistin’
Mehmet Şîrîn Tûnç anî ziman ku siyaseta komploya navneteweyî hê jî berdewam dike û mînaka herî mezin jî êrişên li ser Rojava ye û axaftina xwe wiha bi dawî kir: “Di vê dawiyê de jî, êrişên li ser Rojava mînaka komployê ya herî mezin e . Lê belê Şoreşa Rojava, şoreşeke bingehîn bû. Li hember vê komployê derketin û cara yekemîn li her çar parçeyê Kurdistanê û li tevahiyê cîhanê Kurd daketin qadan û ji bo Rojava bûn yek, dengê xwe bilind kirin. Gelê Kurd plan û nexşeya pergala navneteweyî, bi van çalakiyan vala derxistin. Lê belê hê xeterbûneke mezin heye. Pêwîst e Kurd di vê pêvajoyê de zêdetirî li ser vê mijarê bisekinin, yekîtiya xwe ava bikin, di vî bingehî de encax ev nexşe û plana pergala navneteweyî li ser Kurdan têk here. Ji bo Kurdan îro tişta esasî ew e ku kongreya neteweyî di nava Kurdan de were çêkirin e. Ev kongre dema li her çar parçeyê Kurdistanê Kurdan bike yek ez bawer im wê tevahî êriş û komployên li ser Kurdan tên meşandin dê vala bê derxistin.”
