Wan – Hevserokê DBPa Wanê parêzer Cemal Demîr bal kişand ser sedemên Komploya Navdewletî ya 15ê Sibatê û anî ziman ku hêzên hegemon nedixwestin li Rojhilat Navîn pergaleke wekhev, demokratîk û aştiyane pêk bê.
Li dijî Rêberê Gelê Kurd Abdullah Ocalan di 9ê Cotmeha 1998an de komployeke navdewletî hatibû destpêkirin û di 15ê Sibata 1999an de jî Abdullah Ocalan li Kenyayê hatibû girtin. Hêz û dewletên ku ev komplo pêk anîn, Abdullah Ocalan teslîmî Tirkiyeyê kirin û ji wê demê ve Abdullah Ocalan di Girtîgeha Girava Îmraliyê de tê ragirtin. Gelê Kurd li dijî vê komployê, 15ê Sibatê weke “Roja Reş” ragihand û sekna gelê Kurd û helwesta Abdullah Ocalan ev komploya navdewletî têk bir.
Pêvajoya girtina Abdullah Ocalan
Hevserokê Partiya Herêmên Demokratîk (DBP) yê Wanê parêzer Cemal Demîr ku serdemekê parêzeriya Abdullah Ocalan kiribû, têkildarî 15ê Sibatê axivî û diyar kir ku ev salên dirêj in hesabên hêzên hegemonîk li ser Rojhilata Navîn hene. Cemal Demîr destnîşan kir ku van hêzên hegemon her tim Abdullah Ocalan û Tevgera Azadiyê li pêşiya xwe astengî didîtin û got: “Bi pêşengiya Amerîka û Îsraîlê dewletên NATOyê zexteke mezin li ser Sûriyeyê kirin û Sûriyeyê jî ji ber van zextan nekarî Rêberê Gelê Kurd bihewîne. Rêberê Gelê Kurd neçar ma ku ji Sûriyeyê derbikeve û berê xwe dide Ewropayê. Rêberê Gelê Kurd dibêje ‘Min dikarîbû biçim çiya ango Kurdistanê, lêbelê îhtîmal hebû ku bi tundiyeke mezin êriş bikiribana Kurdistanê.’ Ji ber vê yekê Serok ji bo rêya aştî û dîplomasiyê veke berê xwe da Ewropayê. Lêbelê her dewleta ku diçûyê deriyê xwe digirt û dawiyê de jî hate girtin.”
‘Komplo hat têkbirin’
Cemal Demîr bal kişand ser sedemên vê komployê û diyar kir ku dewletên hegemon nedixwestin meseleya Kurd bi demokrasiyê bê çareserkirin. Cemal Demîr da zanîn ku nedixwestin li Rojhilat Navîn pergaleke wekhev, demokratîk û aştiyane pêk bê û ev yek li axaftina xwe zêde kir: “Ji ber ku li çar perçeyên Kurdistanê û Rojhilata Navîn pergaleke weke xwîşk û biratî, azad, wekhev, demokratîk û aştî pêk bihata, êdî hincet nedima ku Ewropa mudaxaleyê van deran bikira. Lêbelê Serokatî bi berxwedana xwe ev komplo vala derxist û gelê Kurd jî piştgirî da Serokatî. Vê piştgiriyê destê Serokatî xurt kir û ev komplo hat têkbirin. Ji wê demê ve Serokatî ji bo meseleya Kurd bi rê û rêbazên aştiyane û demokratîk bê çareserkirin, di nava hewldanan de ye.”
‘Bandora Rêberê Gelê Kurd li ser gelan mezin e’
Cemal Demîr bi bîr xist ku li dijî komployê hem Kurdan hem jî dostên Kurdan gelek çalakî li dar xistine û wiha pê de çû: “Di zîndanan de gelek kesan xwe şewitandin, bertek nîşanî komployê dan. Ji 9ê Cotmeha 1998an heta 2018an 53ê kesan xwe şewitandin û şehîd bûn û 66 kes jî birîndar bûn. Her wiha tecrîdeke giran a dijmirovî û dijhiqûqî li ser Serokatî hat meşandin. Li dijî vê tecrîdê jî gelê Kurd bertekên xwe anîn ziman û heta niha jî ev yek qebûl nekiriye. Di protestoyên vê tecrîdê de jî ji 2019an heta 2023yan 10 hevalên me jiyana xwe ji dest dan û gelek jî birîndar bûn. Rêberê Gelê Kurd li hemû gelên azadîxwaz û aştîxwaz bandoreke mezin kiriye.”
‘Ji bo selametiya pêvajoyê divê hin tişt bên guhertin’
Bi domdarî Cemal Demîr behsa pêvajoya “Aştî û Civaka Demokratîk” kir û destnîşan kir ku bi hewldana Rêberê Gelê Kurd Abdullah Ocalan pêvajoyek hat destpêkirin û wiha got: “Dîsa nûnerên dewleta Tirk berê xwe dan Îmraliyê û xwestin bi Serokatî re pêvajoyekê bidin destpêkirin. Serokatî jî li ser vê yekê di 27ê Sibatê de bangeke gelek dîrokî kir. Ji vê dîrokê ve hewil dide pirsgirêka Kurd li ser esasê wekhevî, demokrasî û azadiyê bê çareserkirin. Lê ji bo tendirûstiya vê pêvajoyê hin tişt bên guhertin. Divê hem ji aliyê hişmendî, ferasetê ve hem jî ji aliyê fizîkî ve guhertin çêbibin. Lê heta îro jî şert û mercên serokatî nehatine guhertin. Ji bo serkeftina vê pêvajoyê divê Rêberê Gelê Kurd ji aliyê fizîkî ve azad bibe. Lewma Rêberê Gelê Kurd hemû berpirsiyariyên xwe pêk anî û rêxistina wî jî li cem wî sekinî. Lê dewlet jî desthilatê jî heta niha tu gavên şênber neavêtiye. Li ser esasên hiqûqê jî tu gav neavêtine. Serokatî dibêje ku divê ji aliyê hiqûqê ve hin gav bên avêtin û qanûnên azadiyê bên derxistin.”
‘Azadiya fizîkî ya Rêberê Gelê Kurd dê bandoreke erênî bike’
Cemal Demîr bal kişand ser bandora azadiya fizîkî ya Abdullah Ocalan a li ser cîhanê û wiha dawî li axaftina xwe anî: “Azadiya fizîkî ya Rêberê Gelê Kurd wê bandoreke gelek erênî li ser herêmê û cîhanê bike. Pergala Serokatî daye pêşiya me pergaleke demokratîk, ekolojîk e û azadiya jinê û wekheviyê dihewîne. Li dijî hişmendiya netewe-dewletan a yekperestiyê ye. Ev hişmendiya netewe-dewletan em dizanin ku ji bo hemû mirovahiyê pergaleke xerab e. Heke azadiya Rêberê Gelê Kurd pêk bê, dê karibe baştir xebatên xwe bimeşîne, baştir bi her kesî re hevdîtinan bike û pergala ku diparêze ji her kesî re îzah bike.”
