Di danişîna doza duyemîn a cînayeta Narîn Guranê de ku 15 kes ji ber îdiaya “piştgiriya sûcdaran kirin e” tên darizandin, daxwaza beşdarbûnê ya UCÎM û Wezareta Malbat û Xizmetên Civakî hate qebûlkirin.
Zaroka 8 salî Narîn Guran di 21ê Tebaxa 2024an de li gundê Çûlî ya bi ser navçeya Rezana Amedê ve winda bû û cenazeyê wê 19 roj piştre hate dîtin. Danişîna ewil a doza duyemîn a cînayeta Narîn Guranê dest pê kir. Serdozgeriya Komarê ya Amedê di çarçoveya cînayetê de, ji ber sûcê “piştgiriya sûcdaran kirin e” lêpirsîna duyemîn dabû destpêkirin. Di çarçoveya lêpirsînê de derbarê 15 kesan de doz hatibû vekirin. Danişîna ewil a dozê li 17emîn Dadgeha Cezayên Giştî ya Amedê dest pê kir.
Di dozê de dotmama Narîn Guran ya bi navê Bîrsen Guran, mamê wê Fûat Guran, jinapa wê Maşallah Guran, hevjînê meta wê Mehmet Şevket Kaya, kurmetê wê Muhammed Kaya û karkerê Salîm Guran ê bi navê Mehmet Selîm Atasoy weke gumanbarên girtî; keçmeta Narîn Guranê ya bi navê Şeyma Kaya, jinmama wê Hediye Guran, mamên wê Îbrahîm Halîl, Bariş, Kurtuluş û Omer Faruk Guran û zarokên bi navên R.A. (16), M.G. (16) û Î.K. (17) jî weke bersûcên negirtî tên darizandin.
Serokê dadgehê, di dozê de ku zarok jî tên darizandin ji bilî bersûcan, parêzerên bersûcan û xizmên wan nehişt tu kes têkeve eywana danişînê. Darizandin, ji çapemeniyê re girtî hat lidarxistin. Daxwaza beşdarbûnê ya Wezareta Malbat û Xizmetên Civakî û Komeleya Têkoşîna li Dijî Îstîsmarkirina Zarokan a Mamoste Saadetê (UCÎM) hate qebûlkirin. Parêzerên bersûcan ji ber qebûlkirina mudaxilbûna her du saziyan, daxwaza reddî hakim kirin. Dadgehê ev daxwaz red kir.
Danişîna dozê, bi parastinên zarok û faîlan domiya. Li îfadeyên Omer Faruk Guran, Şeyma Kaya, Muhammed Kaya, Şevket Kaya Maşallah Guran, Kurtuluş Guran, Îbrahîm Halîl Guran, Fuat Guran û Hediye Guran hate guhdarîkirin û navber hate dayin.
Danişîn dê piştî navberê bi îfadeyên bersûcên din bidome.
