Şirnex – Waliyê Şirnexê û Gerînendeyê Daristanan ê Şirnexê dibêjin talana daristanan rawestiyaye lê cerdevan berovajiyê gotinên Waliyê Şirnexê tevdigerin û daristanan bênavber talan dikin.
Li daristanên Şirnexê ji sala 2018an ve bi hinceta ewlehiyê daristan tên birîn û heya îro jî li gundên Cilbiya û Bilga yên di nava Çiyayê Cûdî de û li Herêma Besta talana xwezayê berdewam e. Derbarê talana daristanan de weke ajans me xwe gihand Gerînendeyê Daristanan ê Şirnexê Reşît Tûnç û derbarê birîna daran de ji ajansa me re axivî. Her wiha Hevserokê Meclisa Bajêr a Şirnexê Galîp Kulter jî qala hevdîtina bi Waliyê Şirnexê re li ser talana daristanan pêk anî kir.
‘Bi awayek fermî me gotiye daristanan bibirin’
Gerînendeyê Daristanan ê Şirnexê Reşît Tûnç li ser pirsa me ya “Birîna daristanan bi destûra we pêk tê?” got ku “Birîna daristanan bi destûra me bi awayekî fermî pêk tê lê dîmenên beriya niha derketine yên kevn in.” Li ser vê yekê me dîroka kişandina dîmenan jê re got û wî jî diyar kir ku dîmen jî birîna daristanan jî nû ne.
‘Bi awayek devkî me gotiye birîna daristanan rawestînin’
Reşît Tûnç diyar kir ku wan destûr daye kesên daristanan dibirin û awayekî fermî û nivîskî ev destûr daye lê niha bi awayekî devkî û ne fermî û nivîskî gotiye wan kesan birîna daristanan rawestînin.
Hevserokê Meclîsa Bajêr a Şirnexê Galîp Kulter ku li ser birîna daristanan bi Waliyê Şirnex re hevdîtin pêk anîbû jî anî ziman ku walî ji wan re gotiye: “Wezaretê gotiye me birîna daristanan rawestînin û me jî ev biryar xistiye meriyete.”
Gotin û kirin ji hev nagire
Kulter di berdewama axaftina xwe de da zanîn ku ew ji bo kontrolkirina birîna daristanan hatine herêmê û ev tişt gotin; “Em îro çûne cem Waliyê Şirnexê û ji me re gotiye Wezareta Karên Hundir û Wezareta Karên Çandinî û Daristanan gotiye birîna daran bidin rawestandin. Piştî ku em ji cem walî derketin em hatin herêmê û niha em li Herêma Warê Biya ne û li vir talan berdewam e. Ji ber ku herêm gelekî berfireh e, birîna daran zêde ye lê xuya nake bi taybetî darên 100-200 salî tên birîn û îro jî zêdetirî 10 kamyonan darên birî ji vê herêmê derxistine.”
Li gor agahiyên çavkaniyan û çavdêriya ajansa me cerdevanên bajaroka Sêgirkê ya Qilebanê ya Şirnex hêj jî daristanên gundên Cilbiya û Bilga dibirin, her wiha cerdevanên gundê Hosyan ê girêdayî navçeya Berwarî ya Sêrtê ji aliye Sêrtê dikevin herêma Besta û Mêrgûmarê û daristanan dibirin.
