Şirnex – Serokkomarê Tirkiyeyê 11ê Mijdarê weke “Roja Çandina Daran a Mîllî” îlan kiribû. Tevî ku gelek sazî û dezgehên fermî yên dewletê dibêjin “em ji bo parastina xwezayê daran diçînin” jî li aliyê din daristan bi fermana rayedarên dewletê tên talankirin.
Li Şirnex û Sêrtê bi salan e daristan tên birîn û xwezaya her du bajaran tê talankirin. Li herêmê herî zêde dar tên birîn. Ji ber ku li dijî talankirina xwezayê bertekek bi hêz tune ye, pêşî li vê talanê nikare were girtin. Her roj li herêma Besta, li Çiyayên Cûdî û Gabarê darên ku tên birîn bi wesayîtan tînin û dibin bajarên cuda.
Dema bertek tên dayîn jî rayedarên dewletê yên weke walî, gerînendeyên daristan û çandiniyê û parlementerên AKPê daxuyanî didin û dibêjin “em ê êdî destûrê nedin daristan werin birîn” lê ev gotin tenê bi armanca pêşiyê li bertekan bigirin tên kirin.
Dewlet bi destê xwe îhaleyên birîna daran pêk tîne û van îhaleyan rast e rast didin cerdevanan û kesên di bin kontrola dewletê de ne. Roja ku herî kêm 200-300 ton dar neyên birîn tune ye.
Bi çadirkirina wesayîtan dixwazin talanê veşêrin
Destpêkê birîna daristanan bi awayekî aşkere dihat kirin lê piştî bertekên saziyên ekolojiyê û gel zêde bûn êdî talanê bi veşartî dikin. Êdî darên ku tên birîn bi şev ji nav daristanan tînin û li wesayîtan bar dikin û serê wan bi çadiran digirin. Her çiqas bixwazin vê yekê veşartî û bi dizîkî bikin jî, heqîqet bi çi awayî be derdikeve holê.
Li Cûdî, Gabar û Besta dibirin û ji bo kalekolan dibin
Di demên dawî de hemû êzingên li Herêma Besta, Çiyayê Cûdî û Çiyayê Gabarê tên birîn rast e rast ji bo kalekol û qereqolên li bajarên Sêrt, Şirnex, Colemêrg tên şandin. Her wiha ji bo kalekolên li ser sînorê başûrê Kurdistanê û kalekolên di nava tixûbê başûrê Kurdistanê de ne jî têne şandin. Ev yek amadekariya van kalekol û qereqolan a zivistanê ye.
Di roja darçandinê de dar birîn!
Serokkomariya Tirkiyeyê di sala 2019an de 11ê mijdarê weke “Roja Çandina Daran a Mîllî” îlan kiribû. Gelek saziyên dewleta Tirk duh li van bajaran bêyî ku talana xwezayê bibînin ji bo parastina xwezayê şitlên daran çandin. Lê di roja çandina daran a van saziyên dewletê de jî bi sedan dar li Cûdî, Gabar û Besta hatin birîn.
Li ber çavê Waliyê Şirnex nakliyeya êzingên talanê
Gotina “di roja dar çandiniyê de daristan hatin birîn” ne weke şîroveyekî ye. Di kêliyên ku Waliyê Şirnexê li Çiyayê Cûdî reklama çandina şitlan dikirin bi dehan ton darên hatibûn birîn bi TIRan di ber Waliyê Şirnexê re derbas bûn. Ev TIRên ku dar li wan hatine barkirin û hewl hatiye dayîn bi çadiran veşêrin, daran ji bo kalekolên li ser sînor dibin.
