Wan – Platforma Saziyên Demokratîk a Wanê“Hedefgirtina sîstematîk a qadên jiyanê, bi eşkereyî nîşan dide ku mafê jiyanê yê sivîlan bi zanebûn tê binpêkirin û taxên Kurdan bi qestî veguherandine qada şer.”
Platforma Saziyên Demokratîk a Wanê têkildarî êrîşên çeteyên girêdayî Hikûmeta Demkî ya Şamê û Tirkiyeyê yên li ser taxên Kurdan Şêx Meqsûd, Eşrefiye û Benî Zêdê meşek li dar xist. Girseya ku li ber avahiya Partiya Herêmên Demokratîk (DBP) ya Wanê hate cem hev, ji vir heta Qada Bajêr meşiyan û di meşê de pankartên “Rojava; wijdan, berxwedan û azadî ye, hûn nikarin têk bibin” û “Parastina Rojava parastina nirxên mirovahiyê ye” hatin vekirin. Welatiyan di meşê de êrîşên li ser taxên Kurdan bi dirûşmeyên “Rojava Rojhilat e, Kurdistan yek welat e”, “Bijî berxwedana Şêx Meqsûd û Eşrefiyeyê”, “Bijî Serok Apo”, “Bijî berxwedana QSDê” û “Bijî yekitiya gelê Kurd” hwd. bertekên xwe nîşan dan. Rêxistinên DBP û DEM Partiyê yên navend û navçeyan, parlementerên DEM Partiyê yên Wanê, hevşaredarên Bajarê Mezin ên Wanê Neslîhan Şedal û Abdullah Zeydan, Meclîsa Ciwanan, Meclîsa Dayikên Aştiyê, aktivîstên TJAyê, nûnerên saziyên sivîl û gelek welatî tev li meşê bûn.
Piştî meşê li ber WanMall AVMê daxuyanî hat dayîn. Metna daxuyaniyê ya Kurmancî ji hêla hevserokê DBPê yê Wanê Cemal Demîr ve, ya Tirkî jî ji hêla hevseroka Şaxa MEBYA-DERê ya Wanê Hanim Kaya ve hat xwendin.
Cemal Demîr destnîşan kir ku êrîşên ku li ser taxên Şêxmeqsûd û Eşrefiyê yên Helebê bêyî navber tên meşandin, bêguman sûcekî mirovahiyê yê eşkere û li ber çavan e. Cemal Demîr anî ziman ku ev êrîşên ku ji aliyê komên çekdar ên ser bi Hikûmeta Veguhêz a Sûriyeyê ve bi çekên giran tên kirin, rasterast sivîlan dikin armanc û got: “Ev êriş dibin sedema windahiyên sivîl ku di nav de zarok jî hene. Hedefgirtina sîstematîk a qadên jiyanê, bi eşkereyî nîşan dide ku mafê jiyanê yê sivîlan bi zanebûn tê binpêkirin û taxên Kurdan bi qestî veguherandine qada şer. Pêkhatina van êrîşan di pêvajoyeke wisa de ku entegrasyona Hêzên Sûriyeya Demokratîk (HSD) ya bi artêşa Sûriyeyê re û lêgerînên çareseriya siyasî tên nîqaşkirin, gelekî balkêş û manîdar e.”
Bandora êrîşan ya li ser pêvajoya Aştî û Civaka Demokratîk
Di berdewamiya axaftina xwe de Cemal Demîr bal kişand ser bandora van êrîşan a li ser pêvajoya “Aştî û Civaka Demokratîk” û ev tişt anî ziman: “Eşkere ye ku ev êrîş dê di heman demê de bandoreke neyînî li ser pêvajoya Aştî û Civaka Demokratîk a ku li Tirkiyeyê berdewam dike jî bikin. Ev helwesta dijminane ya li hemberî Rojava, armanc dike ku hewildanên HSD’ê yên di warê entegrasyon û çareseriyê de lawaz bike û îhtîmala aştiya herêmî sabote bike. Hêzên li dijî çareseriyê, bi kûrkirina şer dixwazin îhtîmala pêşerojeke demokratîk û aştiyane ya di navbera gelan de bifetisin. Her wiha em bi taybetî binê wê xêz dikin: Ev êrîşên li ser Şêxmeqsûd û Eşrefiyê, berdewamiya wan êrîşên ku berê li Siweydayê li dijî Dûrzîyan û li dijî niştecihên Elewî hatibûn kirin. Ev êrîş berhemê aqilekî tarî ne ku tevna civakî ya Sûriyeyê ya pirnasname û pirbawerî dikin armanc û dixwazin gelan bikin dijminê hev.”
‘Xwedîderketina li Rojavayê xwedîderketina li mirovahiyê ye’
Cemal Demîr da zanîn ku gelê Kurd li hemberî van êrîşan ne tenê ye, ne bêparastin e û ne jî belav e. Cemal Demîr diyar kir ku ew bi wê vîn û rûmeta dîrokî ya ku berxwedana Kobanê derxistiye holê, di parastina destkeftiyên Rojava û mafên gelên Sûriyeyê de bi biryar in û wiha berdewam kir: “Em li cem Rêveberiya Xweser û îradeya jiyana hevpar a gelan in. Gelê Kurd, dê li hemberî van êrîşan bi rêxistinkirî, bi rihê yekîtiya neteweyî û demokratîk, mafê xwe yê berxwedana rewa bingeh bigire û li ber xwe bide. Tu hêzan nekariye gelê me teslîm bigire û wê nekare jî. Em bang li hêzên navneteweyî, Neteweyên Yekbûyî û hemû aktorên têkildar dikin ku êdî ji pozîsyona temaşevaniyê derkevin. Ji bo parastina sivîlan divê demildest berpirsiyarî bête girtin, êrîş bilez bên sekinandin û hêzên êrîşkar bi eşkereyî bên teşhîrkirin. Bêdengî, şirîkatiya vî sûcî ye.”
‘Wê rê li ber şikestinên mezintir vebe’
Cemal Demîr wiha dawî li axaftina xwe anî: “Li vir em bi awayeke vekirî Bangewaziya xwe ji bo raya giştî ya cîhanê, dostên gelê Kurd û hêzên demokratîk dikin: Gelê Kurd bi tenê nehêlin. Piştevaniya bi gelê ku li Şêxmeqsûd û Eşrefiyê li ber xwe dide re mezin bikin. Heke tiştên îro li Helebê diqewimin neyên sekinandin, wê sibê rê li ber wêranî û şikestinên hîn mezintir û yên ku vegera wan tune ye vebe.”
Piştî daxuyaniyê çalakî 5 deqeyan çalakiya rûniştinê bi dawî bû.
