Sêrt – Welatiyên Sêrtê ku li dijî tayinkirina qeyûm, li pêş şeredariyê di çalakiyê de ne bertek nîşanî tayinkirina qeyûm dan û gotin: “Em ê li dijî qeyûm li vir bin. Ew çi dikin bila bikin. Banga me li gelê kurd û gelê Sêrtê ew e ku xwedî li şeredariya xwe derbikevin.”
Wezareta Karên Navxweyî yê Tirk qeyûm tayinî şeredariya Sêrtê ya Partiya Wekhevî û Demokrasiyê (DEM Partî) kir. Piştî qeyûm tayinî şeredariyê kir, hevşeredar Sofya Alagaş û Mehmet Kaysî ji pêywîrê hatin dûrxistin û li şûna wan Waliyê Sêrtê Kemal Kizilkaya pêywîrdar kirin. Piştî tayinkirina qeyûm gelê Sêrtê herikîn pêş şeredariyê û li wir qeyûm protesto dikin. Me jî mîkrofonê xwe dirêjî çalakvanên li ber şeredariyê kir. Ji çalakvanan dayika 80 salî Komrî Kaçar bertek nîşanî tayinkirina qeyûm da û got: “Me şeredarî bi ked û vîna xwe bi dest xist. Ew çend meh in em li ser şeredariya xwe bûn. Ew birçî bûne. Ji bo bidizin careke din qeyûm tayinî şeredariyê dikin. Em ê dîsa li ber xwe bidin û şeredariya xwe bistînin. Xwedê vê yekê qebûl nake.”
‘Çi dikin bila bikin em ê li vir bin’
Çalakvanê bi navê Sadik jî anî ziman ku ew ê li ber şeredariyê çalakiya xwe bidomînin û got: “Qeyûm diz in. Vîna me dizîn. Bi hilbijartinê şeredarên me hatin hilbijartin. Daxwaza me ew e ku dawî li vê sepanê bînin. Qeyûm zilm e. Em ê jî li dijî vê yekê li vir bin. Çi dikin bila bikin.”
Ji çalakvanan Aydin Şen jî bertek nîşanî tayinkirina qeyûm da û wiha axivî: “Qeyûm li dijî hiqûqî ye. Bi vîna me hevşeredar hatin hilbijartin. Ew yek nayê qebûlkirin. Em vê zilme qebûl nakin. Banga me li gelê kurd ew e ku rabin li ser pîyan.”
Ji çalakvanan Leyla Çaprak jî li dijî tayinkirina qeyûm ew bang li gelê Sêrtê kir: “Ew zilm e. Heqeret e. Me bi vîna xwe stand. Em jî li dijî vê yekê ji bo şeredariya xwe hatin vir. Em vê yekê qebûl nakin. Banga me li gelê kurd û gelê Sêrtê ew e ku xwedî li şeredariya xwe derbikevin.”
