Colemêrg – Girtî Fûat Taşkin ku di Girtîgeha Sîncanê de tê ragirtin, ji ber ku naxwaze biçe nava girtiyên bêalî, ew kirin hucreya yek kesî.
Ciwanê bi navê Fûat Taşkin, di 8ê Mijdara 2017an de bi îdiaya “amûrên talûke li cem xwe hiştin e û endamtiya rêxistinê” li Colemêrgê hatiye girtin û 8 sal û 8 meh cezayê hepsê lê hatiye birîn. Taşkin ê ku li Girtîgeha Tîpa L ya Espiye ya Gîresînê dihat ragirtin, 3 roj piştî danişîna di 18ê Cotmeha 2024an de di rûniştina li 1emîn Dadgeha Cezayên Giran a Colemêrgê hat lidarxistin, ji ber sedema “zêde di girtîgehê de maye” hat berdan. 83 roj piştî tehliyeyê di 9ê Çileya 2025an de Taşkin, li Enqereyê ji aliyê polîsan ve bi hinceta “Divê tu îfadeyê bidî” hat binçavkirin. Taşkin ê ji bo îfadeyê çû dadgehê bi hinceta “cezayê wî hatiye erêkirin” hat girtin û birin Girtîgeha Ewlehiya Bilind a Tîpa F ya Hejmara 2 ya Sîncanê. Gardiyanên girtîgehê zext li Taşkin kirine ku biçe qawişa bêaliyan. Taşkin ê ku ev yek red kir û xwest biçe nav girtiyên siyasî, kirin hucreya yek kesî û zextên li ser wî zêde kirin.
Bi telefonê bi malbata xwe re axivî ye
Taşkin ê ku ev 16 roj in di hucreya yek kesî ya li Girtîgeha Sîncanê de tê ragirtin, bi rêya telefonê ji malbata xwe re rewşa xwe ragihandiye. Taşkin gotiye ku tevî serlêdanên wî yên ji bo çûyîna qawişa girtiyên siyasî jî ev 16 roj in di hucreyê de tê girtin. Taşkin aniye ziman ku di nava van 16 rojan de bi muameleyeke xerab re rû bi rû maye û gelek mafên wî hatine binpêkirin. Her wiha Taşkin di peyama xwe de jî bi lêv kiriye ku divê daxwazên wî bên bicihanîn û zextên li ser girtiyan bên dawîkirin.
Polîs ewilî li malabatê geriyan e
Hat zanîn ku di 9ê çileya 2025an de hejmareke ku xwe weke polîs dide naskirin, li xwîşka Taşkin digere û jê re dibêje ku ji ber dosyeyeke 2016an divê Fûat Taşkin îfade bide. Polîsan ji xwîşka wî pirsiye ka Taşkin li ku ye û dû re jî li bavê Taşkin geriyan e. Polîsên ku ji malbatê nekaribûne tiştekî hîn bibin li Fûat Taşkin bixwe digerin û dixwazin ew navnîşana xwe ji wan re bişîne. Taşkin navnîşana mala xala xwe ku li cem wan li Enqereyê dimîne dişîne û polîs diçin wî dixin binçavan.
‘Ji aliyê derûnî ve ez nebaş im’
Hat zanîn ku Taşkin bêyî îfadeya wî bê girtin, şandine girtîgehê. Di têketina girtîgehê de gardiyanan jê pirsîne ku dixwaze li kîjan qawîşê bimîne û Taşkin jî aniye ziman ku ew dixwaze di nava girtiyên siyasî de bimîne. Lê hat diyarkirin ku gardiyanan zext li Taşkin kiriye ku biçe di nava girtiyên bêalî de bimîne û ji ber ku Taşkin ew red kiriye, ew kirine hucreyê. Taşkin di hevdîtina xwe ya telefonê de gotiye ku ji aliyê derûnî ve ew gelekî nebaş e. Malbata Taşkin jî bertek nîşanî vê yekê da û da zanîn ku divê zextên li ser girtiyan bi dawî bibin. Ferdên malbatê anîn ziman ku heke tiştek bê serê kurê wan rêveberiya girtîgehê û kesên rayedar berpirsiyar in û bang li raya giştî kirin ku hê tiştek neyînî çênebûye, bikeve nava tevgerê û xwedî li lawê wan bê derketin.
