Amed – Hevberdevkê Înîsiyatifa Yekîtiya Demokratîk Mehmet Kamaç tekîldarî yekitiya Kurdan diyar kir ku yekitî wek av û nan pêwîst e û wiha got: “Dibe bawerî, bîrdozî û partiyên me cuda bin, lê belê li hemberî hebûna Kurdan êriş hene, divê em bibin yek.”
Piştî êrişên hikumeta demkî ya Şamê yên li Rojavayê Kurdistanê, li her çar aliyê Kurdistanê û cihanê bi milyonan Kurd û dostên Kurdan bi rojan e bê navber çalakiyan li dar dixin. Di nav çalakiyan de tişta herî balkeş ew e ku ruhê yekîtî û netewî li qadên berxwedanê zindî bû û deng dide.
Hevberdevkê Înîsiyatifa Yekîtiyê ya Demokratîk Mehmet Kamaç têkildarî berxwedana Kurd û dostên Kurdan û girîngiya yekitiyê ji Ajansa Welat (AW) re axivî.
‘Em ji herikîneke dîrokî ya dirêj re derbas dibin’
Mehmet Kamaç diyar kir ku daxwaza hêzên navneteweyî ew e ku hem li cîhanê û hem jî Rojhilata Navîn li gorî berjewendiyên xwe dîzayn bikin û got: “Armanca hêzên navnetewî li Rojhilata Navîn li gorî berjewendiyên xwe dizaynkirina siyasetê ye. Di vî warî de hişmendiya gelê Kurd û têkoşîna ku bi salan e ji bo hebûna xwe tê dayîn gihiştiye astekê. Lê belê em ji herikîneke dîrokî ya dirêj re derbas dibin. Li Sûriyeyê dîktatoriya 60 salî têk çû û hêzek din hat ser rêveberiya Şamê. Her wiha aloziyên ser Îranê jî berdewam dikin. Di nav van aloziyan de bi rastî di warê zanistî û dîplomasiyê de pirsgirêka Kurd û Kurdistanê, têkoşîna gelê Kurd gihiştiye astekê.”
‘Rojava dilê hemû Kurdan e, dilê Kurdistanê ye’
Di berdewama axaftina xwe de Mehmet Kamaç anî ziman hêzên navneteweyî dixwazin bi plansaziyên xwe ve rêveberiya xweser têk bibin û Sûriyeyeke navendî ava bikin û ev tişt gotin: “Êrişên ku li Heleb, Eşrefiye û Şêxmeqsûdê hatin destpêkirin, bi rastî nîşaneya vê yekê bûn. Ew êriş li ser Rêveberiya Xweser a Rojavayê Kurdistanê jî dihatin meşandin û dixwestin hebûna Kurdan a li Rojavayê Kurdistanê û rêxistina li wê derê tune bikin. Em her tim dibêjin, Rojava dilê hemû Kurdan e, dilê Kurdistanê ye. Di serdema borî de bedelên giran hatin dayîn. Ji ber wê yekê êrişên li ser Rojavayê Kurdistanê, li dijî hişmendiya gelê Kurd a ruhê yekîtiyê ye. Ev êriş Kurdên diyasporayê yên li Ewropa, Kanada, Amerîka, Awustralyayê şiyar kir. Li hemberî van êrişên hovane, Kurd bertekên xwe nîşan dan û li qadan in.”
‘Kurdan bi yekitiya xwe ve cîhan hejand’
Mehmet Kamaç bal kişand li ser giringiya yekîtiya Kurdan û têkildarî parastina destkeftiyan ev tişt gotin: “Bi salan e em ji bo yekîtiya Kurdan dixebitin û bingeha yekîtiyê ava dikin. Em dizanin ku serkeftina Kurdan û parastina destkeftiyên wan, bi yekîtiyê pêkan e. Heke Kurd bibin yek û bi yek dengî, yek helwestî li ber xwe bidin, dê serkeftin para Kurdan be. Êrişa li ser Rojava di nav gelê Kurd de yekîtiyek xurt ava kir. Kurdan bi yekîtiya xwe cîhan hejand. Kurd mafdar in, heqê xwe dixwazin. Naxwazin di bin desthilata tu kesî de bin. Kurd dixwazin mafên xwe bi dest bixin, bi cihê xwe yê bi rûmet di nava gelên cîhanê de bigirin. Ez spasiya xwe bi taybetî pêşkêşî çapemeniya Kurd dikim ku di van rojan de dengê gelê Kurd bi yekrêzî gihand hemû cîhanê. Em dibînin yekîtiya li ser çapemeniyê, dîplomasiyê ava bûye û ev cihê kêyfxweşiyê ye.”
‘Berxwedana gelê Kurd planên wan têk bir’
Di dawiya axaftina xwe de Mehmet Kamaç tekîldarî encamên berxwedana li qadan a bi rojan e dom dike sekinîn û wiha bi dawî kir: “Wekî tê zanîn êrişa li ser Rojavayê Kurdistanê plansaziyeke berfireh bû. Dixwestin bi taybetî li Rojavayê Kurdistanê di navbera Ereb û Kurdan de şerekî derxin. Heke şerekî bi vî rengî derketiba, wê bandor li Kurdên Iraqê û Bakurê Kurdistanê jî bikira. Plana wan ew bû ku Rojavayê Kurdistanê têk biçe û Kurd bibin dijberên hev. Lê belê bi saya hişyarbûna gelê Kurd, ev plan pûç bû. Yekîtî wekî av û nan pêwîst e. Dibe ku baweriyên me, îdeolojiyên me û partiyên me cuda bin, ev rastiyeke civakî ye. Lê belê li hemberî êrişên hebûna Kurdan hedef digirin, divê em bibin yek. Dema ku berxwedana gelê Kurd derket holê, bandor li peymana wan a “Parisê” jî kir û neçar man ku ji nû ve bi gelê Kurd re rûnin. Ev encama berxwedan û îradeya gelê Kurd e. Bi deh hezaran jin, zarok û ciwan ji bo vê dozê bûn qurban. Divê her kes zanibe ku li ku derê êrişek li ser destkeftiyên Kurdan hebe, gelê Kurd ê bi yekrêzî li hember vê yekê derkeve. Em dibêjin yekîtî, yekîtî û yekîtî!”
