Amed – Hevberdevkê Înîsiyatîfa Yekitiya Demokratîk Mehmet Kamaç ku têkildarî înîsiyatîfê axivî, wiha got: “Divê Kurd di sedsala 21emîn de vê firsenda derketiye pêşberî wan baş binirxînin û yekitiya xwe ava bikin.”
Nûnerên partiyên siyasî yên Kurdistanî, saziyên sivîl ên civakî, rûspî, oldar û bawermend, kesayet, parlamenter jî di nav de 301 delegeyên “Înîsiyatîfa Yekitiya Demokratîk” li Amedê di 10-11ê Gulanê de civîna xwe pêk anîn. Di civînê de parlamenterên Partiya Wekhevî û Demokrasiyê ya Gelan (DEM Partî) Mehmet Kamaç û Gulcan Kaçmaz Sayyîgît weke hevberdevkên înîsiyatîfê hatin hilbijartin û rêveberiyeke ji 35 kesan pêk tê hate hilbijartin. Pişt re deklerasyona civînê bi daxuyaniya çapemeniyê ji raya giştî re hate parvekirin. Hevberdevkê Înîsiyatîfa Yekitiya Demokratîk û parlamentere DEM Partiyê yê Amedê Mehmet Kamaç têkildarî înîsiyatîfê ji ajansa me re axivî.
‘Divê Kurd firsenda derketiye pêşberî wan baş binirxînin’
Mehmet Kamaç bi bîr xist ku bi sedan salan e yekitiya kurdan tê axaftin û wiha got: “Her serdemê li gorî rastiya xwe kar û xebatên yekitiyê pêk anîne. Lê mixabin heta îro jî yekitiya kurdan pêk nehatiye. Di van salên dawî de derfetên baş jî ketin destên kurdan lê ji ber yekitiyek çênebû, ji bo ku di nava xwe de parçe bûn, ji bo ku nêrîna wan li ser mijaran ji hev cudatir bû kurd ketine rewşeke bi vî rengî di rojhilata navîn de bi erdnîgariya xwe û demografiya xwe hatiye parçekirin. Zimanê wan û nasnameya wan nayê naskirin. Yekitî ji bo kurdan wekî av û nan e. Weke nefesê ye. Divê Kurd di sedsala 21emîn de vê firsenda derketiye pêşberî wan baş binirxînin û yekitiya xwe ava bikin.”
Beriya salekê dest bi xebatên înîsiyatîfê kirine
Mehmet Kamaç da zanîn ku beriya salekê dest bi xebatên vê înisiyatîfê kirine û wiha berdewam kir: “Sê parlamenterên ku partiyên wan ji hev cuda, ez, Salîha Aydenîz û Sînan Çîftyurek û ji Odeya Bazirganiyê jî Nevîn Xanim me weke înîsiyatîf dest bi vê xebatê kir. Me got kar û barê me ew e ku em di nava hemû cudahiyên kurdan de yekitiyekê ava bikin. Heta vê astê jî em hatin. Di navbera salekê de me bi hemû cudahiyên civakê re hevdîtin kirin. Me girîngiya vê pêvajoyê û ruhê wê ji herkesê re parve kir. Bi rastî em keyfxweş in ku konferanseke bi vî rengî li Amedê tê lidarxistin. Û bi taybetî kurd, kêmnetewe û ol û baweriyên li Kurdistanê, partiyên siyasî û saziyên sivîl di nav de cih digirin. Delegasyoneke ku ji 300 kesan pêk tê li deklarasyona Yekitiya Demokratîk gotûbêj kirin. Ev xebatên ku em dimeşînin û ev konferansa ku em li dar dixin ne encam e. Ev destpêk e. Em şert û mercên Rojhilata Navîn dişopînin û herkes jî dibîne heke rastî em baş fêm bikin derfetên mezin ji bo miletê Kurd û ji bo aliyên bindestan derketine holê. Divê em di vê konferansê de destpêkê mafên gelê Kurd yên hemû aliyan biparêzin, destkeftiyên wan mezin bikin û mafên hatine binpêkirin bi dest bixin. Ji ber vê yekê ev xebat berdewam e.”
Konferansê di nava hemû kurdan de kelecaniyek ava kir
Mehmet Kamaç bal kişand ser Konferansa Yekrêzî û Yekhelwesta Kurdî ya li Rojavayê Kurdistanê ku di 26ê Nîsanê de pêk hatibû û ew jî tev li bibû û wiha pê de çû: “Vê konferansê di nava hemû kurdan de kelecaniyek ava kir. Hem jî daxwaza civakeke demokratîk bi dengekî bilind hate ziman. Pêkhateyên rojavayê Kurdistanê ev konferans pêk anîn û mînakek bû. Em bi hêvî ne ku dê li bakurê Kurdistanê jî ev xebat ser bikeve. Ev xebat dê li her çar aliyê Kurdistanê ji bo hemû kurdan bibe bingeha kongreya yekitiya neteweyî û destkeftî, parastin û avakirina pêşerojê ya miletê kurd li ser ava bibe.”
‘Em piştgiriya banga birêz Abdullah Ocalan dikin’
Mehmet Kamaç destnîşan kir ku banga Rêberê Gelê Kurd Abdullah Ocalan û xebata wan hevdû temam dikin û wiha dirêjî da axaftina xwe: “Em bi zelalî piştgiriya banga birêz Abdullah Ocalan û civakeke demokratîk dikin. Em di Rojhilata Navîn de bi zelalî daxwaza aştiyeke mayînde dikin. Ev hemû hevdû temam dikin. Em wisa bawer in ku sala 2025an dê bi van pêşveçûn û pêngavan bibe sala kurdan, sala miletên bindest, ol û baweriyên ku tê xwestin bên tunekirin. Em keyfxweş in. Em jî weke Înîsiyatîfa Yekitiyê di vê xalê de cihê xwe bigirin, em bawer in dê serbikeve. Ji bo ku ev derfeta piştî sedsalan derketiye holê were bikaranîn, ji bo gel û ol û baweriyên bindest ev kar û xebatên ku xal bi xal hevdû temam dikin wê li Rojhilata Navîn civakeke demokratîk a di nava aştiyeke mayînde de ava bibe.”
‘Bila hemû aliyên civakê piştgiriya vê xebatê bikin’
Mehmet Kamaç bi lêv kir ku dema vê xebatê dimeşînin rêzê ji hemû ol û bawerî û bîrdoziyên civakê re digirin û ev yek anîn ziman: “Ev hemû dewlemendiya vê civakê ne. Nasnameya me ya herî jor em kurd in, em hatine parçe kirin, derfetên dîrokî di destê me de hene, em li ser nirxên kurdîtiniyê û civakeke demokratîk em ji hemû aliyên civakê dixwazin ku piştgiriya vê xebatê bikin. Înîsiyatîfa Yekitiyê bi pêş ve biçe, mezin bibe. Ev xebat dê bi piştgiriya civakê mezin bibe. Em tev destê hev bigirin, wekhevî, aştî, xwişk û biratî û bi taybetî jî em bi jiyaneke aram tev di Rojhilata Navîn de bicivin û bijîn.”
