Amed – Yekitiya Parlamenterên Jin ên Kurd êrişên ser taxên Şexmeqsud û Eşrefiye yên Helebê bi daxuyaniyekê şermezar kirin û gotin: Destwerdan derfetên aştiyê têk dibin.
Di 6ê Çilê de çeteyên girêdayî hikûmeta demkî ya Şamê û Tirkiyeyê li dijî taxên Şêxmeqsud û Eşrefiyeyê yên Helebê êriş pêkanîn û gelek sivîl di van êrişan de hatin qetilkirin. Yekitiya Parlamenterên Jin ên Kurd li dijî êrişên li Helebê diqewimin daxuyaniya nivîskî dan.
‘Êriş bi eşkere polîtîkayekî tasfiyekirinê ya etnîkî ye’
Parlamenterên Jin ên Kurd ku li Kurdistanê û diyasporayê dijîn di daxuyaniya xwe de êrişên çeteyên girêdayî hikûmeta Şamê û yên li dijî taxên Şêxmeqsûd û Eşrefiyeyê li Helebê şermezar kir û wiha gotin: “Ev êrîşên ku sîvîlan, jin û zarokan hedef digirin, bi eşkere polîtîkayên jenosîda etnîkî û koçberkirina bi zorê ne. Buyerên ku li Helebê tên pêkanîn, bi gotinên “ewlehî” û “îstîqrarê” tên veşartin; lê ev bi eşkere polîtîkayekî tasfiyekirinê ya etnîkî ye û bi şêweyekî plankirî, sîstematîk û domdar bi taybetî gelê Kurd hedef digire û armanca wê koçberkirina bi zorê ye.”
‘Wekî rejîma Esad îxtîmalên qetlîamên nû vedikin’
Yekitiyê di daxuyaniya xwe de bal kişand ser girîngiya îradeya siyasî û muzakereyê û wiha got: “Her cure destwerdanên herêmî û navneteweyî ku têkbirina derfetên aştiyê hedef digirin, wekî li Helebê pêk hatin, dê bi berxwedana xurt a gel re rû bi rû bimînin. Bi armanckirina destkeftiyên gelê Kurd, helwadanên afirandina pergaleke yekperest li Suriyeyê îxtîmala qetlîamên nû vedike. Wekî mînaka rejîma Esad.”
‘Têkoşîna gelê Kurd tu hêzên çekdarî nikare bişkîne’
Di dawiya daxuyaniyê de Yekitiyê anî ziman ku saziyên Yekitiya Ewropayê (YE) û Neteweyên Yekbûyî helwesteke rast diyar nekirin li hemberî sûcên şer û hovîtiya li dijî jinan ên li Helebê divê bêdeng neminin û wiha got: “Ji bo ku ev hovîtî neyên dubarekirin, berbirsyariya dikeve ser milên wan û divê vê berpirsyariyê bînin cih. Em wekî Parlamenterên Jin ên Kurd deklere dikin ku em bi dil û can li gel gelê xwe yê li Rojavayê ne. Em bawer dikin ku têkoşîna gelê Kurd ya ji bo azadî û demokrasiyê ji hêla tu hêzên çekdarî ve nayê şikandin.”
