Amed – Xelkên Zozanê Hesendînê her sal bi girseyî diçin serdana ziyareta “Bavê Hazir.” Xelkê herêmê diyar kirin ku ev ziyaret ji bo wan gelek girîng e û gotin: “Bi destê şîrketa madenê tê xwestin ku ziyareta me jî xera bikin.”
Şîrketa Anonîm a Bazirganiya Derve û Kanzakariyê ya Pasûrê bi awayekî bêhiqûqî Zozanê Hesendînê talan dike. Li zozanan nobeta xelkê herêmê ya ji bo parastina ax, av û xwezayê berdewam dike. Şêniyên herêmê her sal di 26ê meha Tîrmehê de diçin Çiyayê Andokê û 28ê mehê jî diçin serdana ziyareta “Bavê Hazir.” Ev ziyaret ji bo xelkê herêmê gelek pîroz û girîng e. Bi sedan sal e diçin serdana ziyaretê. Li Zozanê Hesendînê bi çar hawirdor di bin metirsî û gefa madenê de ye. Her wiha xelkên herêmê dibêjin ku Ziyareta Bavê Hazir ku ji bo wan pîroz e jî di hedefa şîrketa madenê de ye. Welatiyên ku serdana ziyaretê kirin hestên xwe yên ji bo ziyaretê û dijberiya xwe ya madenê û metirsiyên wê anîn ziman.
‘Bi sedan sal e ev ziyaret ya me ye’
Welatiyê bi navê Ramazan Îlgen destnîşan kir ku malbata wî bi sed salan e tên vir ziyaretê û got: “Pîrika min berî sed sal e hatiye ziyareta ‘Bavê Hazir’. Bavê min jî hatiye îro jî ez hatime ser ziyaretê. Ez 70 salî me ez têm vir. Îro tê xwestin ku ziyareta me were rûxandin. Nêzî 10 gund li derdora ziyaretê hene. Her kes bi salan e tên li vir ziyaretê. Îro Zozanê Hesendînê tê xwestin ku bê talankirin. Her tiştê me li ser zozanan e. Em debara xwe bi zozanan pêk tînin. Bi sedan sal e ev ziyaret ya me ye.”
‘Ziyaret ji bo me gelek girîng e’
Dayîka bi navê Azîze Can jî diyar kir ku ev ax û ziyaret ya bav û kalê wan e û wiha axivî: “Ev ax bi hezaran sal e ya me ye. Em naxwazin ziyareta me bê xerakirin. Îro zilmê li me dikin. Av û debara me li ser zozanên me ne. Îro hatine zozanên me talan dikin. Ev ziyaret ji bo me gelek girîng e. Em madanê li vir naxwazin.”
‘Bi destê madanê tê xwestin ziyaret were xerakirin’
Welatî Fadil Kaya jî anî ziman ku ev sed sal e tên li vir ziyaretê tewaf dikin û wiha got: “Îro bi destê madanê tê xwestin ku ziyareta me were xerakirin. Îro maden çêbibe dê zozan, ziyaret û malên me herin. Em madanê qebûl nakin. Ziyareta ‘Bavê Hazir” dîrokî û olî ye. Her sal em tên li vir. Lê îro ziyareta me di bin xeterê de ye. Dewlet jî jixwe me dixapîne. Di serî de gotin maden tuneye lê dawiyê eşkere kirin ku dê maden were çêkirin.”
‘Xwedê qebûl neke’
Welatiyê bi navê Feyzullah Îpek jî diyar kir ku ev ziyaret bi salan e li vir e û ew jî bi salan e tên li serdana ziyaretê. Feyzullah Îpek bi bîr xist ku xelkê herêmê debara wan li ser zozanan e û da zanîn ku îro ji bo madanê gelek kes axa xwe difiroşin û got: “Xwedê van tiştan qebûl neke.”
