Platforma Ked û Demokrasiyê ya Amedê ji bo çar karkerên di hilweşîna pirê ya li Pasûrê de jiyana xwe dest dan li ber Plazaya AZCyê kom bûn û qezaya karkeran şermezar kir.
Pira ser rêya Pasûr û Mûşê ku ji aliyê Midûriyeta Giştî ya Rêbejahiyê (KGM) û Karên Avê ya Dewletê (DSÎ) tê çêkirin, di 11ê mijdarê de hilweşiya. Di hilweşînê de 5 karker di bin kavilan de man û 4 karker jiyana xwe dest dan. Platforma Ked û Demokrasiyê ya Amedê têkildarî bûyerê daxuyanî da.
Çalakî bi tevlîbûna nûner û rêveberên saziyên sivîl, partiyên siyasî li ber AZCê ya Ofîsê pêk hat. Kedkaran di daxuyaniyê de pankartên “Em komkujiya karkeran qebûl nakin” û “Qezayên kedê polîtik in” vekirin û dirûşmeya “Vaye AKP, vaye rant” berz kirin. Hevseroka Sendikaya Kedkarên Buroyê (BES) Guneş Ozel daxuyanî xwend. Guneş Ozel destnîşan kir ku li ser vê axê her roj karker tên kuştin û wiha got: ”Kuştina karkerên Pasûrê jî wekî hemû bûyerên din ji ber sersariyê pêk tê. 5 roj berê li Dîlovayê heman sersarî pêk hat. Tevî vê yekê Wezareta Xizmeta Civakî û Malbatê hê jî bêdeng e. Em ê hesab ji rantxuran bipirsin.”
Daxuyanî bi dirûşmeya “Bijî berxwedana karkeran” bi dawî bû.
