Serokên Baroyên 16 bajarên Kurdistanê wê li Enqereyê bi Serokê Meclisê Numan Kurtulmuş û partiyên siyasî re li ser xebatên destûra bingehîn û mafê heviyê hevdîtinan pêk bînin.
Serokên 16 Baroyên ji Kurdistanê dê di 17-18 hezîranê de biçin Enqereyê û derbarê destûra bingehîn û rojeva pêvajoyê de bi nûnerên partiyên siyasî re rêze hevdîtin pêk bînin.
Serokên Baroyên Semsûr, Agirî, Êlih, Çewlîg, Bedlîs, Dêrsim, Amed, Colemêrg, Îdir, Qers, Mûş, Riha, Şirnex, Mêrdîn, Sêrt û Wanê dê biçin Enqereyê û li meclisê hevdîtinan bikin.
Têkildarî mijarê Serokê Baroya Amedê Abdulkadîr Guleç anî ziman ku dê 16 baro ji bo pêvajoya nû daxwazên xwe bînin ziman û pirsgirêka kurd çareser bibe biçin bi partiyên siyasî yên li Meclisa Tirkiyeyê re hevdîtinan bikin.
Abdulkadîr Guleç anî ziman ku dê bi partiyên ku li meclisê ne li ser meseleya Kurd û çareseriya meseleyê hevdîtinan bikin û got “Em ê bi Serokê Meclisa Tirkiyeyê Nûmar Kurtulmuş re hevdîtinan bikin. Em ê baroyên herêmê bi awayekî nivîskî daxwazên xwe bînin ziman.”
Dê mafê hêviyê bixwazin
Serokê Baroya Amedê Abdulkadîr Guleç anî ziman ku dê bixwazin pirsgirêka kurd bi awayekî siyasî û hiqûqî bê çareserkirin û wiha got: “Ji bo qedexeyên li ser ziman bi dawî bibin û pirsgirêka kurd bi awayekî siyasî û hiqûqî çareser bibe em ê daxwazên xwe bînin ziman. Dîsa emê bixwazin ku Destûra Bingehîn a Nû bê avakirin. Di vê Destûra Bingehîn de hemû beşên civakê xwe têde bibînin û mafên wan bê parastin. Ji bo mafê gelê Kurd û Tirk bi zagonan bê parastin em ê bixwazin Zagonek Nû bê sazkirin. Dîsa ê bixwazin mafê hêviyê bê parastin û hemû girtiyên siyasî bên berdan û ji bo vê yekê divê zagon bê guhertin.”
