Danişîna doza duyemîn a Narîn Guran didome. Di vê kêliyê de li pêşiya Edliyeya Amedê daxuyanî hate dayin û bang li darazê hate kirin ku heqîqeta cînayetê derxîne holê.
Zaroka 8 salî Narîn Guran di 21ê Tebaxa 2024an de li gundê Çûlî ya ser bi navçeya Rezana Amedê ve winda bûbû û cenazeyê wê 19 roj piştre hate dîtin. Danişîna ewil a doza duyemîn a cînayeta Narîn Guran ku 15 kes ji ber sûcê “piştgiriya sûcdaran kirin e” tên darizandin, li 17’emîn Dadgeha Cezayên Asliyeyê ya Amedê tê lidarxistin.
Komîsyona Zarokan a Partiya Wekhevî û Demokrasiyê ya Gelan (DEM Partî) li pêşiya Edliyeya Amedê daxuyanî da. Hevberdevka Komîsyonê Bêrîtan Guneş diyar kir ku doza Narîn Guranê hemû civakê eleqedar dike û got: “Di cînayeta Narîn Guran de heqîqet derneketiye holê û ev yek xetereyê li ser hemû zarokan çêdike. Heke dewlet di vê cînayetê heqîqetê dernexîne holê dê sûcên li dijî zarok û jinan zêdetir bibin û dê ji vê berpirsyar be. Hêvîdarin ku ev doz bi heqîqetê biencam bibe.”
Parlamenterê CHPê yê Amedê Sezgîn Tanrikulu jî li pêşiya edliyeyê daxuyanî da. Tanrikulu biryara di doza yekemîn de rexne kir û got: “Biryareke bihincet a ku weke parêzerekî mirov qaneh bike nehate nivîsandin û hêj jî nayê zanîn ka kujerên Narînê kî ne û çima kuştine. Hêvîdarim gumanbarên vê dozê di vê mijarê de agahiyekê bidin. Hêvîdarim ev darizandin faîlan û bûyerê derxînin holê.”
