Welatijanê ke waşt projeyê GES’î ke serê erdê înan de yeno viraştene, protesto bikerê rastê hêrişê cendirmeyan ê bi guleyanê plastîk ameyê. Hêrişan de tay welatijî birîndar bîyê.
Dewa Kervansaray a girêdayeyê qezaya Sûr ê Amedî de dewijan vera projeyê enerjîyê rojî (GES) çalakî viraşte. Welatijan viraştişê GES’î protesto kerd û waşt ke şîrket û dewlete destê xo erdê înan ra bianco. Dewijê herême vanê ke projeyê GES’î erdanê ramitiş û cayanê ciwîyayîşê înan de yeno viraştene û no zî do tesîro xirab cuya înan ser o bikero. Welatijan dîyar kerd ke xoverdayîşê înan seba pawitişê erd û cuya dewe dewam keno.
Welatijî birîndar bîyê
Wexto ke dewijan waştêne eşkerayî bidê mudaxeleyê cendirmeyan reyde rî bi rî mendî. Verî bi bombaya gazî û dima ra zî guleyê plastîkî vera welatijan ameyê şuxulnayene. Dewijê ke mîyanê hêgayan de vila bîyê, bi çepik û sloganan hêrişî şermezar kerd. Netîceyê hêrişî de tay kesî birîndar bîyê. Welatijan bi îmkananê xo hetkarîya kesanê ke birîndar bîyê, kerd. Dewijan veng da rayedaran ke projeyî vindarnê û destê xo cuya înan ra biancê.
