Cinîyanê TJA dîyar kerd ke Prosesê Aştî û Komelê Demokratîk seba xurtkerdişê têkoşînê vera sîstemê pederşahî, firsendêko pîl o û rayîrê ney zî xo rêxistinkerdiş o. Cinîyan teda û zordarîyê îradeyê cinîyan ser o ardê vîr û vengdayîşê beşdarîye û xurtkerdişê têkoşînê azadîya cinî kerd.
Programê 8ê Adare Roja Cinîyan a Dinya emserr Kurdîstan û Tirkîya de bi vengdayîşê “Aştî û Komelê Demokratîkî” yeno pêşwazîkerdene. Mîrasê cinîyanê ke vera koletî serewedarito, ewro binê sîwanê felsefeyê “Jin jîyan azadî” de beno yew. Têgêrayîşê Cinîyanê Azad (TJA) zî bi nê îradeyî, amadekarîyanê xo yê 8ê Adare tena sey pîrozbayî nê sey prosesêkê rêxistinbîyayîşî yê vera zîhnîyetê camêrdê serdestî pênase keno. Aktîvîstanê TJA ra Belkisa Suleymanoglu û Hayrîye Akîkol 8ê Adare û prosesê “Aştî û Komelê Demokratîkî” erjna.
‘Ma kenê ke cinî bibê kerdoxê hêzdarî’
Belkisa Suleymanoglu bale ant xebatanê rêxistine yê mîyanê komelî ser o û dîyar kerd ke dima ke prosesê “Aştî û Komelê Demokratîkî” dest pêkerd û bi ameyîşê 8ê Adare Roja Cinîyan a Dinya sey Têgêrayîşê Cinîyanê Azad (TJA) bi xebatanê xo yê taxan ma cehd kenê ke prosesê aştî bi hewayêko serkewte aver berê, keye bi keye gêrenê û cehd kenê ke cinî mîyanê komelî de bibê kerdoxê hîna hêzdarî.
‘Proses seba xo rêxistinkerdişî firsendêko pîl o’
Belkîsa Suleymanoglu dîyar kerd ke demo ke hêrişê destkewteyanê Rojava ame kerdene, hêrişkaran bi taybetî cinî kerdê hedef, cinîyê şervanî awanîyan ra ameyê eştene û gêsê înan ameyê qesnayene. Suleymanoglu vat ke nê kerdişî bîyê sebebê hêrsêko pîl û ney xo reyde ruhêko xoverdayîşî ard û wina vat: “Sebebê nê hêrişan rasterast şenikkerdişê cinîyan bi. La cinî ne bi mergan û ne zî bi qesnayîşê gêsan şenik nêbenê. Ma zî vera nê hêrişan qerarê xo yê rêxistinkerdişî xurt kerd û seba xo rêxistinkerdişî zî ganî nêro xovîrrakerdene ke prosesê ‘Aştî û Komelê Demokratîkî” firsendêko pîl o.”
‘Eke ma cinî prosesê aştî de ca nêgêrê, azadîye mumkin nîya’
Hayrîye Akîkol zî dîyar kerd ke bi serran o cinî bi hewayêko polîtîk û sîstematîk yenê çinhesibnayene, heme hetê komelî bêheqverdayîşê cinîyan ser o xebitîyenê, la ewro bi saya têkoşînê Têgêrayîşê Cinîyanê Azad, bi saya ê şervananê cinî ê qehreman ke vera hovîtîya DAIŞ’î serenêtewna, hêz û moralêko bêemsal vejeyo orte.”
‘Çîyo ke do ma bikero wayîrê destkewte xo rêxistinkerdiş o’
Derheqê lazimtîya têkoşînî de zî Hayrîye Akîkol ard vîr ke bêyê cinîyan cuyêka azade awan nêbena û wina veng da cinîyan: “Çi keweno milê ma cinîyan ser o ganî ma seba xurtkerdişê têkoşînê Têgêrayîşê Azadîye xo rêxistin bikerê. Na çarçewa de zî ameyîşê 8ê Adare û prosesê Aştî û Komelê Demokratîk firsend o. Ganî ma cinî hêzê xo bikerê yew û bêre têhet û ma dest bierzê prosesî ke vernîya prosesî nêro girewtene. Çîyo ke do nê prosesî de ma bikero wayîrê destkewte, xo rêxistinkerdişê cinîyan bi xo yo.”
