Endamanê Grûba Wendekaran ê YYU-KURDÎ bale ant 10ê Adare Roja Cil û Belganê Kurdî ser o û vat: “Estbîyayîşê ma kulturê ma reyde girêdaye yo. Ma bi kulturê xo sereberz ê, nê semedî ra Roja Cil û Belganê Kurdî seba ma sembolê yewîye û sereberzî yê.”
10ê Adare Roja Cil û Belganê Kurdî nê serranê peyênan de bîya rojêka muhîme ke kurdî her hetê Kurdîstanî de bi xoradayîşê cilanê xo yê neteweyî na roje pîroz kenê. Na roje reya ewile serra 2010î de ameye eşkerakerdene. Labelê mîyanê şarî de û bi taybetî sazgehanê perwerdeyî de serra 2012î ra nat bi hewayêko fermî û hîrayêr yena pîrozkerdene.
Roja Cil û Belganê Kurdî bi qerarê Hukmatê Herêma Kurdîstanî (Wezaretê Perwerdeyî) bi amancê pawitişê kultur û sadeyîye, daşinasnayîşê cilanê kurdî azanê neweyan rê û mojnayîşê zengînîya kulturê kurdî ameye îlankerdene.
Grûba Ziwan û Edebîyatê Kurdî ya Unîversîteya Yuzuncu Yilî ya Wanî (YYU-KURDÎ) Ofîsê Ciwanan ê Unîversîte de 10ê Adare Roja Cil û Belganê Kurdî pîroz kerd.
Endamê YYU KURDÎ Elî Akin û Dîjle Ozdîl ke beşdarê pîrozbayî bîyê ajansê ma rê qisey kerd.
Elî Akinî bale ant manayê 10ê Adare Roja Cil û Belganê Kurdî ser o û vat: “Ziwan, kultur û hunerê kurdî manayê estbîyayîşê şarê kurdî yo. Lazim o ma wayîrê erjanê xo vejîyê. Tena rojanê taybetan de nê, ganî ma cuya rojane de zî wayîrê nê kulturî vejîyê. Estbîyayîşê ma kulturê ma reyde girêdaye yo. Tarîx de şarê kurdî bi nê cil û belgan ame şinasnayene. Nê erjê ma yê, estbîyayîşê ma nînan ser o yo û manayê cil û belganê kurdî seba ma xeylê zaf o.”
‘Roja cil û belganê kurdî seba ma sembolê yewîye û sereberzî yo’
Endama YYU-KURDÎ Dîjle Ozdîl îfade kerd ke 10ê Adare Roja Cil û Belganê Kurdî seba înan wayîrê manayêkê xeylê gird o û wina vat: “Na roje nîşaneya tarîx, kultur û nasnameyê şarê kurdî ya. Nê cilî tena cil nîyê, ê eynê wextî de tarîx û tradîsyonê ma mojnenê. Na roje reyde ma wazenê kulturê xo bipawê, nasnameyê xo bidomnê û bimojnê. Ma bi kulturê xo sereberz ê, nê semedî ra Roja Cil û Belganê Kurdî seba ma sembolê yewîye û sereberzî ya.”
