Federasyona Gaziyan bi daxuyaniyekê hêzên komkujiya Helebceyê pêk anîn şermezar kirin û qurbaniyên komkujiyê bi bîr anîn. Di daxuyaniyê de soza pêkanîna xeyalên şehîdên Helebceyê hate dayîn.
Federasyona Gaziyên Bakur û Rojhilatê Sûriyeyê (FGBRS) bi boneya salvegera 38emîn a Komkujiya Helebceyê daxuyaniyek nivîskî da. Di daxuyaniyê de hate bibîrxistin ku gelê Kurd bi salan e ji bo jiyanek bi rûmet têdikoşe û wiha hate gotin: “Gelê Kurd rastî gelek komkujî, koçberî û zextên giran hat. Yek ji wan jî Komkujiya Helebceyê ya 16ê Adara 1988an e. Hêzên rejîma Baasa Iraqê li dijî xelkê Helebceyê yê başûrê Kurdistanê bi çekên kîmyewî êrişeke herî nemerd û hovane pêk anî. Di encama vê êrişê de, di nav wan de zarok, jin, kal û pîr jî heyîn, bi hezaran Kurd şehîd û birîndar bûn.”
‘Pergal li hemberî komkujiyê bêdeng ma’
Di daxuyaniyê de hate ragihandin ku êriş û komkujî dê tu carî di bîra civakî ya gelê Kurd û mirovatiya azadîxwaz de neyê jibîrkirin û wekî yek ji lekeya herî reş a li ser eniya dîrokê bimîne. Di daxuyaniyê de ev tişt hatin gotin: “Li hember vê hovîtiyê hêzên qaşo ji bo mafên mirovan têdikoşin ji tirsa pergala serwer a li ser xwîna mirovan xwe xwedî dike, bêdeng man. Hêzên herêmî yên li ser tinekirin û înkara Kurdan xwedî heman fikrî ne jî li hember vê trajediya ji bo mirovatiyê şermeke mezin e, çavên xwe girtin.”
‘Komkujiyê nekarî têkoşîna azadiyê asteng bike’
Di daxuyaniyê de hate bibîrxistin ku tevî êriş û komkujiyan jî li hemû parçeyên Kurdistanê têkoşîn û hêviya azadiyê ya gelê Kurd nesekinî û ev xal hatin destnîşankirin: “Rêber Apo, ji bo gelê Kurd careke din rastî komkujî û qirkirinan neyê têkoşîneke herî bi rûmet pêş xist û pêş dixe. Gelê Kurd îro li her devera lê ye li ser esasê fikir û felsefeya Rêber Apo xwe rêxistin dike û yekitiya xwe xurt dike. Em weke gaziyên şer komkujiya Helebceyê ya dikeve sala 38’an bi tundî şermezar û rûreş dikin. Ji malbatên şehîdên Komkujiya Helebceyê re careke din sersaxiyê dixwazin. Her wiha ji gazî û birîndarên Helebceyê re jî şîfaya lezgîn dixwazin.”
‘Em dê xeyalên şehîdan pêk bînin’
Daxuyanî wiha bi dawî bû: “Bi hevgirtin û yekitiya îro li Rojavayê Kurdistanê şênber bûye, teqez em ê welatekî azad ê hêvî û xeyalê hemû şehîd û birîndaran e pêk bînin. Wê tevahî êş û janên me li ser xakeke azad bibin haveynê rojên azad û bedew.”
