Platformê Yewîya Cinîyanê Kurd bi eşkerayîyêk cangorîyê qirkerdişê Helebçeyî yad kerdê û wina vat: “Seba pawitişê estbîyayîşê şarê kurdî, rûmet û azadîya ey, vîr3e Helebçeyî ganî bibê hêzê tewr gird ê têkoşînê ma û yewîya ma.”
Platformê Yewîya Cinîyanê Kurd bi munasebetê serrgêra qirkerdişê Helebçeyî eşkerayîyêka nuştekî weşanaye. Eşkerayî de ame vatene ke Qirkerdişê Helebçeyî nêyeno xovîrrakerdene û wina ame vatene: “16ê Adara 1988î de şaristanê Helebçe yê başûrê Kurdîstanî, rejîmê Baasê Îraqî ra bi fermanê Sedam Huseyînî hêrişêko hovane vera şarê ma kerd. No hêriş çarçewaya Enfalî de ame kerdene û tarîxî de hêrişanê tewr sîya û şerm ê meridmîye yeno qebulkerdene. Enfal sey jenosîdêk yeno naskerdene ke tede des hezar sîvîlê kurdî ameyê çinkerdene, bi seyan dewî ameyê wêrankerdene û qirkerdişê sîstematîk ameyê kerdene. Helebçe tena trajedîyêka herêmî nêbi; eynê wextî de vîrêko hêzdar ê dejê şarê kurd û wêranbîyayîşê giran o ke ciwîyayê. Eynê wextî de o hişyarîyêka xurt a vera sîyasetê çinkerdiş û îmhayî yo. Dinya eynê wextî de xeylê reyan bêveng menda la ewro ganî ma nê çîyî xo vîrra nêkerê û destûr nêdê ke bêro xovîrrakerdene.”
‘Vîrê Helebçeyî do bibo hêzê têkoşînî’
Eşkerayî de bi vatişê, “Ma cangorîyanê Helebçeyî bi rêzdarî yad kenê û beşna xo hemverê şehîdanê ci tewînenê” cangorî ameyê yadkerdene û nê çîyî ameyê vatene: “Seba pawitişê estbîyayîşê şarê kurdî, rûmet û azadîya ci, vîrê Helebçeyî ganî bibo hêzo tewr gird ê têkoşînê ma û yewîya ma.”
