Fermandarê Pêroyî yê HSD’yî Mazlûm Ebdî vat: “Ma hazir ê ke hêzan û dezgehanê xo îdareyê dewleta Sûrîye rê entegre bikerê. Seba ke nê babetî bêrê caardene, ma rê xerîtayêka ni îdareyê Şamî lazim a.”
Fermandarê Pêroyî yê HSD’yî Mazlûm Ebdî vat ê wazenê ke çarçewaya seyyewbînîye de wa pêro şarê Sûrîye bibê yew.
Mazlûm Ebdîyî ajansê ANHA rê qisey kerd û nê vatî: “Ê ke ma bi parçekerdişê Sûrîye sûcdar kenê ez înan rê reyna sey cewabî vajî, ma goreyê prensîbanê xo yê sabîtan têgêrenê. Ma wazenê ke çarçewaya seyyewbînîye de wa heq û rolê heme sûrîyeyijan bidîyê ci. Ma yewîya Sûrîye wazenê. Ma paştî danê hukmatê Şamî û heme welatî ra vilabîyayîşê îdareyê dewlete yê Sûrîye ke ma do bibê leteyêkê ci, bi kêfweşî peşwazî kenê. Ma sey sûrîyeyijan sey kota nê çarçewaya hemparîye de hazir ê ke hêzan û dezgehanê xo heme hêzan û dezgehanê dewlete rê entegre bikerê.”
Fermandarê Pêroyî yê HSD’yî Mazlûm Ebdîyî ard ziwan ke zengînîye binerdî yê Sûrîye aîdê heme sûrîyeyijan ê û vat: “Seba ke na zengînîye bi hewayêkê edîlî semedê îstîkrar û refahê şarê Sûrîye bêrê parekerdene, ma hazir ê ke bidê binê çimdarîya hukmatê Şamî. Seba ke nê babetî bêrê caardene ma xerîtayêka bi îdareyê Şamî lazim a. Bi nê qeydeyan ma eşkenê babetanê ke qala ci kenê lezûbez bidê ciwîyayene.”
