Birayê Rayberê Şarê Kurdî Abdullah Ocalanî Mehmet Ocalanî ke kombîyayîşê keyeyî kerd, hişyarîye daye ke pawitişê birayê xo şertê tecrîdê Îmralî de êdî seba weşîya ci tehlukeyê heyatî yo û ganî rew şertê ci yê fîzîkî bivurîyê.
Mehmet Ocalanî ke Rayberê Şarê Kurdî Abdullah Ocalanî reyde kombîyayîşê keyeyî kerd, ANF’yî rê qisey kerd û hişyarîye daye ke pawitişê birayê xo şertê tecrîdê Îmralî de êdî seba weşîya ci talûkeyê hayatî yo û ganî lez şertê ci yê fîzîkî bivurîyê.
Mehmet Ocalanî vat ke 21ê adare de bi warzayê xo Alî Ocalanî û avukatanê Buroyê Huqûqî yê Asrînî reyde şî Îmrali. Birayê ci yew saete înan reyde, yew saete zî avukatanê xo reyde ameyo têhet. Ocalanî vat: “Çimanê Serekî de demêko derg o nêweşîye est a. Keyeyê ma de genetîk o. Vat ke çimê xo ra reyna amelîyatê kataraktî bîyo.”
Ocalanî vat ke kombîyayîşî de babetê sîyasî zî ameyî qiseykerdene û wina vat: “Newroz û roşanê ma pîroz kerd. Mesajê Newroze resna. Babetanê prosesî ser o qisey kerd. Bi hewayêko pêroyî dîyar kerd ke hewteyêk mîyan de tayê qewmîyayîşî şênê bibê. Vat ke piştîdayîşê xo yê seba haştîye dewam kenê û 24 saetî seba naye xebitîyeno. La tekîd kerd ke no proses yew hetî ra nêşêno aver şêro. Vat ke seba çar parçeyanê Kurdîstanî de çareserîye xurt bibo destê xo ra çi ameyo, kerdo.”
Ocalanî vat: “Mi ci ra vat ke ma hetê Kurdkî ra dewrêko zaf krîtîk de yê. Mi vat ke se ra 80ê kurdan ziwan û kulturê xo vindî kerdo. Ey zî ard vîrî ke 50 serrî yo seba ke ziwan û kulturê Kurdkî vindî nêbo têkoşîn kenê û do dewam bikerê. Vat ke ganî ziwanê Kurdkî bi qanûnan binê pawitişî de bibo. Ganî perwerdeyê bi ziwanê dayîke bibo.”
Mehmet Ocalanî bale ante naye ser o ke şertê tecrîdî yê Rayberê Şarê Kurdî Abdullah Ocalanî yê Îmralî de tu vurîyayîşêk nêbîyo û na rewşe weşîya ci ser o zî tesîr kena. Ocalanî vat: “28 serrî nê şertan de asin zî bimano helîsîyeno. Sey kesê ke 28 serrî yo Serekî tewr zêde zîyaret kerdo ez şêna vaja ke nê kombîyayîşî de mi o hetê fîzîkî ra hem pîrbîyaye hem zî betilîyaye dî. Labelê mîyanê ma de tena di serrî est ê. Moralê ci rind bî la mi bi xo dî ke na gama peyêne de çetinîye anceno. Şertê tecrîdê sîstematîkî yê Îmralî o betilnayo. O 77 serrî yo û êdî pawitişê ci nê şertê tecrîdî de, bi rêjeya ritûbetî qebûl nêbeno.”
Ocalanî vat: “Ez tîya ra venga dewlete dana: Serek mabênê şaran de pird o, meseleyêk ke tu kes nêşêno çareser bikero nê şertanê giranan de bi xo cehd keno ke çareser bikero, dewlete ganî naye hesab bikero. Ganî nê şertê tecrîdî lez bivurîyê. Mendişê Serekî nê şertan de seba weşîya ci zaf talûkeyin o. Serek 77 serrî yo. Ganî lez şertê ci yê fîzîkî bivurîyê û Îmralî ra bivejîyo.”
