Newroza Colemêrgî ke rîyê şertê hewayî ra ameybî taloqkerdene bi coşêko gird dest pêkerd.
Saetanê serê sibayî ra zaf hemwelatîyî bi cil û berganê kurdî herikîyayî warê Newroze yê Otogarê Tekserê. Binê sîya koyê Simbilî de ciwanî û cinîyê ke rîyê xo kesk, sur û zer neqiş kerdo, bi heyecanêko gird Newroze pîroz kenê û bi coşêko gird govende gênê.
Warî ra posterê Rayberê Şarê Kurd Abdullah Ocalanî ameyî akerdene û ciwanan tîşortê ke resmê Ocalanî ser o yê, xo ra dayo. Şîarê “Bijî Serok Apo” warî de veng dano.
Bi des hezaran kesî ke warî ra kom bîyê bi deyîran ke sahne ra yenê vatene, bi dawile û zurneyan govendê cur bi curî yê Colemêrgî gênê. Coş û heyecanê Newroze bi heme germîya xo dewam keno.
