Platformê Ekolojî yê Varto û xeylê sazgehê sivîlî yê Îzmîrî vera projeya JES a Gimgimî vengê xo berz kerd û dîyar kerd ke ey do herre û bawerîya xo nêkerê qurbanê hirsê sermayeyî.
Platformê Ekolojî yê Varto û komeleyê bawerî û heremî seba rekasîyon mojnayîşî projeyê JES’î Gimgimî bidê Meydanê Kasaplar ê Çîglîyî yê Îzmîrî de ameyê têhet. Welatijan pankarte “Şarê Gimgimî JES nêwazeno! Dest merze awe û herra mi”, akerd û bi slogananê sey “Dest mede hewa, awe û herra mi”, “Wa sermaye destê xo herra mi ra bianco”, “Şîrketo jehr vila keno Gimgim ra şore” û “Bêveng memanê, JES’î ra vaje ney” berz kerd. Sewbîna zî dovîzê bi kurdkî û tirkî yê sey “Herra ma rotiş û îxanetî rê girewteya” û Gimgim JES’an nêwazeno” ameyê girewtene. Welatijan ke vernîya eşkerayî de binê varanî de govende çarna, bi sloganan îtîrazê xo da mojnayene.
Eşkerayî de Parlamenterê DEM Partî yê Îzmîrî Îbrahîm Akin, temsîlkarê partîyanê sîyasî, sazgehê komelî û xeylê welatijî tewrê çalakî bîyê, Temsîlkarê komeleyanê herêmî vernîya eşkerayî qisey kerd û bale ante serê zeraranê JES’î yê serê xoza û vengdayîş kerd ke vera na proje têkoşînêko hempare bêro rayraberdene.
Badê ra Îbrahîm Akin qisey kerd ke na proje do herêmeka hîra yê Gimgimî bifîno binê tehlukeyî û vat: “Eke uca sondajeke bêro kerdene, ma do nêeşkê vernîya ey bigîrê. Mîtîngo ke do 24ê nîsane vera JES’an Gimgim de bêro viraştene zaf muhîm o. Eke ma vera nê projeyî nêvinderê do rîskê girdî seba Gimgimî biqewimîyê. La cayê ke elewî tede zêdeyê, polîtîkayêka bi zanitene rayrabenê. Wazenê polîtîkaya rijnayîşî bidê rayraberdene. Wexto vîyarte de merdimê ma ameyê koçberkerdene, nika zî wazenê seba karê sermayedaran merdiman ca û warê xo ra bikerê.”
‘Na proje, projeyê mudaxaleyê warê ciwîyayîşî ya’
Serê nameyê Platformê Ekolojî Bahar Koç metnê çapemenî wend û dîyar kerd ke cografyaya Gimgimî bi manayê “enerjî” û “averşîyayîşî” bi tehlukeyê talanî ra rî bi rî yo. Bahar Koç dîyar kerd ke proje 19 dewan û warêko nêzdîyê 453 hezar metrekare gêna mîyanê xo û vat: “Projeyê JES’î yê plankerdeyî tena bi amancê enerjî nîya; rasterast mudaxeleyê serê warê ciwiyayîşî yo, yewparçeyîya ekosîstemî û heqê qanûnî yê. Gimgim serê xetê fayî yê aktîf e de û tarîx de erdlerzê rijnayene dîyê. Vera na rastîye, ganî projeyê JES’î yê ke tesîr serê hemsencîyê awa binê erdî û çîyê jeolojîk kenê, bi hewayêko zanistî bêrê erjnayene. Goreyê ‘prensîbê îhtîyatî’ yê huqûqê warê cuye; eke tehlukeyêko gird yan zî yê ke tira nêyeno agêrayene bibo, ganî nê projeyî bêrê vindarnayene. Nê çarçewayî de her karêko ke bê erjnayîşê zanistî û xoser bêro kerdene, vera huqûqî yo.”
‘Serê Gimgimî binê ey ra vayênî yo’
Bahar Koç ard ziwan ke proje zerar dano çimeyanê awe, hewa û weşîya şarî û wina vat: “Herra Gimgimî dinyaya bawerîya şarê herême de tena cografyayêk nîya; bi heme kerra, awe û daranê xo cayêko pîroz o. Warê projeyî de xeylê zîyarî û cayê pîrozî estê ke şar bi seserran o tede îbadetê xo keno. Talankerdişê xoza tena talankerdişî ekosîstemî nîyo, la vîrê bawerî yê hezar serran û dewamîyê kulturî yê şarê herême zî keno hedef. Ma do herre, awe û waranê xo yê cuye teslîmê hirsê karê şîrketan nêkerê. Ma do bi rayîrê huqûqî û meşrû têkoşînê xo dewam kenê. Xoza ma reyde cuyena, ma xoza reyde estê. Serê Gimgimî binê aye ra vayênî ya.”
