Parlamentera DEM Partî ya Mûşî Sumeyye Boz derheqê talanê xoza ke Mûş de û herême de dewam keno dîyar kerd ke Kurdîstan de projeyî tena seba ekonomî nîyê, seba “Fetisnayîşê cuye” yenê amadekerdene. Sumeyye Boz vera talanê xoza vengdayîşê têkoşînê hempare kerd.
Parlamentera DEM Partî ya Mûşî Sumeyye Boz, derheqê projeyanê Santralanê Enerjîya Jeotermal (JES) yê Gimgimî û talanê serê çemê Muradî û Deşta Şênî, ajansê ma rê qisey kerd. Sumeyye Boz, bale ant polîtîkayanê texrîbatê ekolojî yê Kurdîstanî ser o û dîyar kerd ke herême de xoza bi polîkayanê “ewleyî” yena talankerdene.
‘Kurdîstan de amanc qirkerdişê cuye yo’
Sumeyye Boz dîyar kerd ke daristanê înan yenê talankerdene, awa înan yena jehrîkerdene û wina vat: “No projeyêkê îşxalî yo, hetê Tirkîya de na polîtîka bi zîhnîyetê ekonomî û kapîtalîzmî yena rayraberdene. La gama ke babete bena Kurdîstan polîtîkayê ewleyî yê se serran ameyê rayraberdene û kapîtalîzm resenê yewbînan. Tîya de her tewir çinkerdiş, qirkerdiş û fetisnayîşê cuye vejîyeno meydan.”
‘Ganî şarê Mûşî mil bidê yewbînan’
Dewamê qiseykerdişê xo de Sumeyye Boz, bale ante rewşa zafkulturî ya Mûşî ser o û wina vengdayîşê têkoşînê hemparî kerd. “Mûş şaristanêko homojen nîyo, tede ereb, tirk, kurd, laz û çerkezî est ê. Pawitişê Mûşî, bi helwêstê cuyêka demokratîk mumkin o. Seba afirnayîşê cuyêka newa û komelêko demokratîk, ganî ma têkoşînê seba xozayî û azadîye ya cinî hîra bikerê û têkilîya înan pîya awan bikerê.
‘Heta netîceyê huqûqî yenê destkewtene ganî têkoşîn dewam bikero’
Sumeyye Boz, derheqê munaqeşeyanê ke “prosesî” ser o yenê kerdene vindert û bale ante rolê Rayberê Şarê Kurdî Abdullah Ocalanî ser o. Sumeyye Boz dîyar kerd ke heta prosesêko şênber û huqûqî nêro awankerdene, ganî têkoşîn nêro sistkerdene û wina qiseykerdişê xo qedêna: “Eke ma têkoşîn nêdê û vajê ‘proses est o’ ma do vîndî bikerê. Îqtîdar polîtîkayanê xo domneno, ma zî ganî têkoşînê xo bikerê. Her çiqas hêvîya ma aştî biba zî , ganî ma îhtîmalê qeraranê negatîf yê îqtîdarî zî xo vîr ra nêkerê.”
