Sekreterê Pêroyî yê Neteweyanê Yewbîyeyan Guterresî seba şerê mabênê Amerîka-Îsraîl û Îranî hişyarîye daye û vat: “Ganî no şer bêro vindarnayene. Eke no şer nêro vindarnayene îhtîmal û tehlukeyêko gird est o ke no şer Rojhelatê Mîyanênî de hîra bibo.”
Sekreterê Pêroyî yê Neteweyanê Yewbîyeyan (NY) Antonîo Guterresî seba şerê mabênê Amerîka-Îsraîl û Îranî hişyarîye daye û vat: “Ganî no şer bêro vindarnayene. Eke no şer nêro vindarnayene îhtîmal û tehlukeyêko gird est o ke no şer Rojhelatê Mîyanênî de hîra bibo û tesîrê xo heme dinya ser o bikero.”
‘Ganî şer bêro kontrolkerdene’
Sekreterê Pêroyî vengdayîş kerd ke hem hêrişê hetê Dewletanê Yewbîyeyan ê Amerîka (DYA) û Îsraîlî yê vera Îranî yenê kerdene, hem zî hêrişê Îranî yê ke vera dewletanê herême bi hewayêko dihet bêrê vindertene. Sekreterî îfade kerd ke lazim o verê ke şer kontrolî ra vejîyo, no kaos ganî bêro kontrolkerdene.
Guterresî Merkezê NY’yî New York de rojnamegeran ra wina vat: “Ma bi endîşe yê ke şer hîrayêr bibo û Rojhelato Mîyanên bigîro mîyanê xo û eynê wextî de tesîranê cidî yê bi tehluke dinya ser o bikero.”
