Yewîya Wendekaran şaristanê Dêrike de hewldayîşê hukmatê demkî ya vurnayîşê nameyê dibistanan şermezar kerd û vat no hêrişêko rasterast vera erjê şaran û mirasê şehîdan o.
Hukmato demkî yê Sûrîya herêma Reqa û Tebqa de, bê ke keyeyanê şehîdan goşdarî bikerê, nameyê dibistananê ke bi nameyê şehîdan ê vurneno.
Derheqê naye de bi desan wendekaranê şaristanê Dêrike, Dibistanê Yûsif El Azma kom bî û eşkerayî da. Wendekaro bi nameyê Elend Hesen eşkerayî wende û nê çîyî ardî ziwan “Şehîdê ma erjê ma yê tewr pîroz ê. Şehîdê ma vîrê ma yê ganî yê fedekarî, xoverdayîş û rûmetî yê. Her şehîdêke ma hîkayeyê xoverdayîşê mendişî û sembolê îradeyê şarî yo.”
Dewamê eşkerayî de wina ame vatene: “Hukmatê Demkî yê Şamî wazeno nameyê dibistananê ma bivurnê û nameyê şehîdanê ma bi nameyêko bîn bivurno. Wazenê bi hawayêko despotîk nê vurnayîşî ma ser o ferz bikerê. Ma nê hêrişî rasterast serê erjanê ma vînenê. Ma qetî kenê ke vurnayîşê nameyan tena vurnayîşêk şeklî nîyo. La hewldayîşêk seba estiritena vîrê komelî yo. Musnayîş tena girewtişê agahîyan yê mîyanê dêsanê dibistanî de nîyo. La berpirsiyarîya pawitene û averberdişê nasnameyê ma, ziwanê ma, kulturê ma û erjê ma yê. Naye ra ma sîyaseto ke ma ser o yeno ferzkerdene ma red kenê, ma do bi qerardarî îradeyê xo yê estbîyayîşî bipawê.”
