Avûkat Resul Temûrî verê roniştişê dewaya muxabirê ma Nedîm Orûçî pare kerd ke Nedîm sey rojnamegerêk nê, sey çalakîkerêk yeno muhakemekerdene û wina vat: “Ez bawer kena ke Nedîm nê roniştişî de bi merdimanê bînan reyde ke yenê muhakemekerdene, do serbest bêro veradayene.”
Muxabirê ajansê ma Nedîm Orûç, 14ê çele de wexto ke taxa Nûrî ya Cizîr de xebere taqîb kerdêne, bi şîdet ame destbendkerdene û dima ame girewtene. Derheqê muxabirê ma Nedîm Orûçî de îdianame ameye amadekerdene. Mehkemaya Cezayanê Giranan a 1. a Şirnexî îdianameya ke dozgerî amade kerda û rojnamegerîye sey suc vînena, qebul kerd. Roniştişê verên ê dewaya Nedîm Orûçî do 24ê nîsane de bêro kerdene.
Parêzer Resûl Temûr verê roniştişê embazê ma Nedîm Orûçî qisey kerd.
‘Bi zor û şîdet ame destbendkerdene’
Avûkat Resul Temûrî da zanayene ke Nedîm Orûç bi serran o cayê de ke tede ciwîyeno, uca de rojnamegerîye keno û wina vat: “Seba ke uca de kar keno, taqîbkerdişê xeebranê komelî û beyanatan de hertim bi eynî hêzanê ewlekarî rî bi rî maneno. Yanî ma behsê rojnamegerêkê kenê ke Cizîr de polîsî ey nas kenê. Wexto ke ame destbendkerdene, ey sey rojnameger çalakîya protestoyî ya vera hêrişanê Rojavayî taqîb kerdêne. Wexto ke ma zindan de ey de di, ey vat ke badê qedîyayîşê protestoyan, wexto ke waşto cayê hedîse ra şêro, polîsan nasname waşto, ey zî kartê xo yê rojnamegerîye mojnayo û polîsan ci rê vato ke eşkeno şêro. Labelê tam eynî deqa de, ekîbêkê bîn ê polîsan yeno û ferman dano polîsanê bînan ke Nedîm zî bêro destbendkerdene. Naye ser o bi zor û şîdet yeno destbendkerdene. Wexto ke Nedîm ame destbendkerdene, kartê ey ê çapemenîye ci de bi û kameraya ey zî destê de bîye. Rixmê naye ame destbendkerdene, girewtiş û derheqê ey de bi îdiaya “beşdarê çalakîyan bîyo”, “vera polîsan teqemenî şuxulnaya”, “rîyê xo girêdayo”, “zerar dayo malê dewlete” û “propagandaya rêxistine kerda” îdianame ameye amadekerdene.”
‘Girewtiş, vera azadîya kesan û rojnamegerîye binpaykerdişê heqan o’
Resul Temûrî qiseykerdişê xo de dîyar kerd ke Nedîm Orûç bi îdiaya sey çalakîkerêk beşdarê protestoyan bîyo ame girewtene û wina domna: “Hem qonaxê îfadeyî de hem zî mîyanê îdianame de xeberê ke ey verê bi nasnameyê xo yê eşkera amade kerdî zî bîyê babeta sucdarkerdişî. Bi taybetî, taqîbkerdişê beyanatê çapemenîye yê xoapeyantişê têgêrayîşê azadîye, şîyayîşê ey ê Başûrî û roportajê ey ê şervanêkî reyde, sey nuqtaya sereke ya sucdarkerdişî ameye mojnayene. Bi no hewa, bi eşkerayî aseno ke Nedîm semedê xebatanê xo yê rojnamegerîye yeno muhakemekerdene. Cigêrayîşê ewlekarî yê derheqê roportajê Nedîmî de, hîrê aşmî verê destbendkerdişê ey ameyo amadekerdene. Yanî eke Nedîm wextê xebere de nêameyêne destbendkerdene zî, xora semedê karê ey do cipersayîş destpêbikerdêne. Emnîyeto ke nê cipersayîşî keno û emnîyeto ke ey destbend kerdo û sey “protestokerî” mojneno, eynî emnîyet o. Girewtişê Nedîmî, hem semedê azadîya merdiman hem zî semedê astengkerdişê karê rojnamegerîye binpaykerdişê heqan o.”
‘Muhakemekerdişê rojnamegerîye nêbena sebebê cezakerdişî’
Resul Temûrî vat ke înan muracatê Mehkemaya Destûrê Binyadî (AYM) kerdo, labelê AYM’yî hîna dewaya Nedîmî nêgirewta rojevê xo. Temûrî qiseykerdişê xo wina qedîna: “Dosyaya Nedîmî de ey de 9 kesê bînî zî yenê muhakemekerdene. Bi temamî 10 kesî bi îdiaya beşdarbîyayîşê protestoyan yenê muhakemekerdene. Kesê ke yenê muhakemekerdene pêro kurd ê û tena semedê protestokerdişê hêrişanê vera Rojava yenê muahkemekerdene. Her çend Nedîmî sey rojnamegerêk hedîse taqîb kerdbo zî, sey çalakîkerêk yeno muahkemekerdene. Rastîye na ya ke; eke o sey çalakîkerêk beşdarê protestoyî bibîyêne zî, ganî no nêbîyêne babeta muhakemekerdişî, çike no heqêko binyadî yo. Ganî na çalakî çarçewaya heqê ‘kombîyayîş, çalakî û azadîya îfadeyî’ de bêra vînayene û ganî heme bêrê veradayene. Ez bawer kena ke Nedîm nê roniştişî de do bêro veradayene.”
