Dardekerdiş û caardişê Îranî yê vera cinîyan, çalakîkeran û sîyasetmedaranê Rojhelatê Kurdîstanî û Îranî ser o, ameyê şermezarkerdene.
Dardekerdiş û caardişê Rejîmê Îslamî yê Îranî yê vera cinîyan, çalakîkeran û sîyasetmedaranê Rojhelatê Kurdîstanî û Îranî, Mardîn û Şirnex de çalakîyê şermezarkerdişî ameyê organîzkerdiş. Çalakîya şermezarkerdişî de ame vatene ke çi cayê Kurdîstanî de hêrişêk şarê kurdî ser o bibo do hetanî peynî vera ê hêrişan têkoşîn bêro kerdiş.
Şirnex
Silopîya de bi beşdarîya parlementera DEM Partî ya Şirnexî Newroz Uysal Aslan, partîyanê sîyasî, sazgehanê komelkî û welatijan eşkerayêk vera caardişanê Rejîmê Îranî daye. Newroz Uysal Aslan vat ke rejîm hêrişanê xo şarê Rojhelatê Kurdîstanî ser o zêde keno û dîyar kerd ke herêma Kurdîstanî de hêrişêk şarê kurdî ser bibo, ê do vera hêrişan vinderê. Eşkerayîy bi sloganê “Biciwîyo yewîya şarê Kurdî” qedîya.
Mardîn
Qezaya Artuklu ya Mardînî de zî bi beşdarîya Platformanê Sazgehanê Demokratîk, partîyanê sîyasî û welatijan eşkerayîyêk daye. Eşkerayî de caardişê rejîmê Îranî yê şarê Rojhelatê Kurdîstanî ser o ameyê şermezarkerdene. Badê eşkerayî, 5 deqîqa roniştiş ame viraştiş.
