Dewijê dewa Zivinga Şikaka yê qezaya Basa ya Şirnexî, 6 rojî yo ke hetê leşkeran û kesê bi nameyê Abdullah Onerî ra yenê astengkerdene û nêşinê şêrê dewa xo. Dewijanê dewe vera na astengîye nerazîbîyayîşê xo mojna û waşt ke na astengî bêra hewanayene.
Dewa ke serranê 90î de amebî veşnayene û vengkerdene, serranê peyênan de hetê serekê verên Abdullah Onerî ra sey cayêko rantî yena xebitnayene. Abdullah Oner destûr nêdano dewijî agêrê keyeyanê xo û daranê dormeyê dewe dano birnayene. 28ê gulane de zî dewijê ke waşt şêrê dewa xo, rastê herişê Abdullah Oner û merdimanê ey ameyî.
‘7 kesî birîndar kerdî la ameyê veradayene’
Dewijê bi nameyê Îbrahîm Taş ke Êlih ra ameyo, dîyar kerd ke Abdullah Oner seba rantî destûr nêdano ê şêrê dewe û vat: “Dewlete serranê 90î de bi zilm ma dewe ra vetî. Kesê bi nameyê Abdullah Oner zî vat keyatî bidê mi ez dewe ra biewnîya la çîyêk nêkerd. Dima ra darê birranê ma dayê birnayene û ma ey ra vat êdî bes. Wexto ke dewijê ma ameyî dewe, êrişê înan kerd û 7 dewijê ma birîndar kerdî. Labelê dimayê naye zî ameyî veradayene.”
Seba birnayîşê daran yenê astengkerdene
Îbrahîm Taşî da zanayene ke leşkerî pawitişê Abdullah Onerî kenê û wina vat: “Çend rojî yo ma tîya de yê labelê leşkerî nêverdanê ma şêrê serê hera xo. Eke ma agêrê dewe, o êdî nêşino daranê daristanê dewa ma bido birnayene û pereyanê ci biwero. Seba nê nêverdanê ma şêrê dewe.”
‘Her kes wazeno Abdullah Oner milk û malê ma biwero’
Heybet Tîtîza ke wazena agêra serê erdê xo zî vat ke seba pereyan destûr nêdano ê şêrê dewa xo û wina qisey kerd: “Nê kesî seba ke her çîyê dewe biwerê, nêverdanê ma şêrê dewa xo. Dewe qîmê ma pêrûnan kena, wa sey însanan bêrê ma pîya biwer. Tu kes piştgirî nêdano ma; ne leşkerî, ne zî dewê dormeyî. Pêro wazenê ke tena Abdullah Oner milk û malê dewa ma biwero. Ma wazenî agêrî û reyna dewa xo awan bikerî labelê destûr nêdanê.”
