Cînîyanê Qezaya Gimgimî ya Mûşî vera talanê ekolojî vat: “Heta ke têkoşînê ma netîce bigêro ma çalakîyanê xo bidomnê.”
Qezaya Gimgimî ya Mûşî de vera talanê ekolojî mîtîng ame viraştene. Bi hezaran kesî beşdarê nê mîtîngî bîyê û vera jeotermalê nerazîbîyayîşî xo mojna. Mîtîngî de ma mîkrofonê cînîyan rê derg kerd. Cînîyî ke ajansê ma rê qisey kerd vat: “Heta ke têkoşînê ma netîce bigêro ma do çalakîyanê xo bidomnê.”
‘Ma welatê xo nêdanê kesî’
Alev Yilmaz, dewa Uskura qezaya Gimgim de heywanan ra ewnîyeno û babeta jeotermalî ser o qisey kerd vat: “Ma welatê xo ra zaf hes kenê. Dar û bar, ko, awa welatê ma, gulî, vilê welatê ma zaf rind o. Kal û pîranê ma ra mendê. Ma rê teberik o. Ma welatê xo nêdanê kesê. Ma seba welatê xo mirenê. Kiştişê ma beno la ma welatê xo nêdanê. Wexto ke tîya de jeotermal virazê welatê ma nêmanêno. Tîya bê mordem kenê. Tîya ra 1000 serrî ra ver bi zordayîş ma dewanê ma ra kerd. Nika ma reyna dewa xo veng nêkenê. Se kenê wa bikerî ma welatê xo rê wayîr vejîyenê.”
Alev Yilmaz bal ant polîtîkayanê dewlete ser o û vat: “Verê cû dewê ma veşnayê ma tîya ra koç kerd. Nika zî pê talanê xoza wazenê ma koç bikerî. No zîhnîyet ê sîstemî yo. Mugla de, Denîzlî û Ege se kerd? Kerd tar û mar. Nika zî dest eşto Kanîreş, Gimgim, Xinis, Çat. Tîya cayê depremî yo, saetêk no kar tîya de bikerê deprem beno. Têkoşînê ma heta ke ma qezenc bikerî do dewam bikero. Ma heta koyanê welatî azad nêkerê destanê xo înan ra nêancenê. Ma înan hevîya xo de xeneknenê.”
‘Jeotermal virazî her çîyê ma şino’
Şenay Yurtsever nêwaştişê xo yê jeotermalî îfade kerd û vat: “Jeotermal tîya de bêro viraştiş ma gerek tîya ra bar bikerî. Domanê ma tîya de yê, meşte ma tîya de yê. Ma şêrî kotî? Tîya de jeotermal virazê malê ma şino, heywanê ma her çîyê ma şino. Ne tîya de heywanî weye benê, ne zî ma eşkenê tîya de biciwîyê. Nê jeotermalî nêweşî vejenê. Yanî ma jeotermal nêwazenê.”
Aysel Dalli zî vera jeotermalî behsê tekoşînê şarî kerd û wina domna: “Tîya de jeotermal virazî ma rê herra ma rê bizerar o. Ma heta netîce bigîrê ma do têkoşîn bidê. Ma welatê xo nêdanê kesî.”
‘Ma wayîrê herra xo vêjîyenê’
Hasret Taşdemîr zî nêwaştişê xo yê jeotermalî îfade kerd û vat: “Herra ma rote nîya. Ma wayîrê herra xo vêjîyenê. Ma coka ameyê tîya. Ma pêro pîya têkoşînî rayra berê.”
Ozlem zî seba wayîrê herra xo vêjîyê Stenbol ra ameyê û vat: “Ma wayîrê welatê xo vejîyenê. Ma welatê xo nêdanê çewî.”
Suna Çelîk zî vat: “Ma welatê xo çewî rê pêşkêş nêkenî û jeotermal nêwazanê. Ma Vartoyê xo nêdanê kesî.”
