Karkerê madenî yê ke seba heqdestê xo 8 rojî yo grevê veşanîye de yê, waşt ke ver bi Wezaretê Enerjî rayra şêrê. Karkeran barîkatê polîsan rijnayê û dest bi rayîrşîyayîşî kerd. Ney ser o polîsan hêrişê karkeran û girseyî kerd û Serekê Onur Saglik-Senî Başaran Aksu û Serekê Sendîkaya Madenî ya Xosere Gokay Çakir ameyî destbendkerdene.
Karkerê madenî yê ke girêdayê Sendîkaya Xoser a Karkeranê Madenî yê û şîrketê Dorukî de xebitîyenê, seba ke heqdestê xo bigirê Anqara de dest bi çalakî kerdbî. Karkerê ke grevê veşanîye de yê, roja 8. de waşt ke ver bi Wezaretê Enerjî rayra şêrê. Parlamenterê DEM Partî Ferît Şenyaşar, Serekê Pêroyî yê TÎP’î Erkan Baş, parlamenterê CHP’yî, partîyê sîyasî, endamê sazgeh û sendîkayan û xeylê kesan seba paştdayîşî karkerî zîyaret kerdê.
Karkeran rayîrşîyayîşî ra ver demêko derg binê dorpêçî de çalakîya xo domnaye. Karkeranê ke nêrazîbîyayîş vera dorpêçê polîsan mojna, seba ke bale biancê cilê xo vetî. Ferît Şenyaşarî zî seba paştîdayîşî cilê xo vetê û tewrê karkeranê nîm-rit b. Karkeran bi slogananê sey “Serkewtiş ê karkeran o ke xover danê”, “Yewîya karkeran do sermaye bin fîno” û “Bi xoverdayîşî ma do ser kewê” nêrazîbîyayîşê xo nîşanê polîsan da.
Karkeran barîkatî rijnayê
Badê demêk karkeran vera astengîyan waşt ke ver bi wezaretî rayra şêro. Ney ser o polîsan dormeyê karkeran girewt û destûr nêda. Karkeranê mîyanê dorpêçî û girseyê paştdayîşî yê ke peyê barîkatan de mendbi, barîkat û dorpêçê polîsan rijna. Demêko derg mîyanê karker, girse û polîsan de kaos vejîya. Karkeranê ke reyna waşt rayra şêrê, barîkatî rijnayê û mîyanê parke de vila bîyî.
Serekê sendîkayan ameyî destbendkerdene
Badê ke karkeran dorpêçî rijnaû mîyanê parke de vila bîyî, polîsan bi xazê îsotî hêrişê karkeran û girseyî kerd. Polîsanê ke bi şîdet hêriş kerd, nêverda ke rojnamegerî zî dîmenan bîgirê. Polîsan bi hêrişî girseyê paştîdayîşî parke ra vete. Bi nê hewayî karkerî parke de tena mendî. Polîsan Serekê Onur Saglik-Senî Başaran Aksu û Serekê Sendîkaya Madenî ya Xosere Gokay Çakirî destbend kerd.
Binê dorpêçî de çalakîya karkeran dewam kena
Badê ke polîsan girse û karkerî yewbînî ra cîya kerdî, karkerî reyna girewtê binê dorpêçî û nêverda ke girse bîkewo parke. Karkerê madenî binê dorpêçî de bi sloganan çalakîya domnenê. Girseyo ke wazena şêro hetê karkeran zî hetê polîsan ra yeno astengkerdene. Girseyê teberê parke zî bi sloganan nêrazîbîyayîşê xo nîşanê astengkerdişî dano.
Çalakîya karkeran binê dorpêçî de dewam kena.
