Şarê Amedî prosesê ewroyî ser o qisey kerd û bal ant bêgamîya dewlete ser o. Welatîyan dîyar kerd ke heta statuyê Rayberê Şarê Kurdî Abdullah Ocalanî nêro naskerdişê na mesele çareser nêbena û vat: “Aştî bi îradeyê şarî û bi Rayberîya ci mumkin a.”
Prosesê “Aştî û Komelê Demokratîkî” ke bi vengdayîşê 27ê Sibata 2025î yê Rayberê Şarê Kurdî Abdullah Ocalanî dest pêkerdbi, serre nîm peyê xo de verda. Nê prosesî de Rayberê Şarê Kurdî Abdullah Ocalan û Têkoşînê Azadîye yê Kurdan xeyê gamî eştî. Labelê dewleta Tirkîya, awankerdişê Komîsyonê Meclîsî ra vete, hema gamêka şênbere nêeşta. Rayberîya Têgerayîşê Apocî, serrgêra yewine ya kongreya fesihkerdişê PKK’yî de, rewşa peyêne ya prosesê “Aştî û Komelê Demokratîkî” ser o Herêmanê Pawitişî yê Medya de eşkerayîyêka çapemenîye viraşt. Rayberîye eşkerayî de dîyar kerd ke ganî gamê huqûqî bi lez bêrê eştene, Rayberê Şarê Kurdî Abdullah Ocalan sey muxatabo fermî bêro vînayene û statuyê ci bêro dîyarkerdene.
Amed de zî rojeve de munaqeşayê nê prosesî ser o her ke şonê zêde benê. Şarê Amedî vera bêgamîya dewlete bi reaksîyon o û na rewşe mîyanê şarî de bêbawerîye virazena. Welatîyan dîyar kerd ke heta statuyê Rayberê Şarê Kurdî Abdullah Ocalanî nêro naskerdene û gamê şênberî nêyênê eştene, no proses ser nêkeweno. Welatîyanê Amedî nê fikrê xo ajansê ma rê vatî.
Welatîyan da zanayene ke hukmatî heta nika tena qisey kerdo, pratîk de qet yew bedilîyayîş nêbîyo. Welatîyan vat ke şarê kurdî nika ra pey nêwazeno bi qiseyanê vengan bêro xapênayene û polîtîkayêka raştikêne wazeno.
‘Aştî bi îradeyê şarî û bi Rayberîya ci mumkin a’
Welatîyan statu û azadîya Rayberê Şarê Kurdî ser o vat ke çîyo tewr muhîm statuyê Rayberîye yo û muxatabê sereke yê aştî Abdullah Ocalan o: “Heta ke statuyê Rayberê Şarê Kurdî Abdullah Ocalanî nêro naskerdene nê problemî çareser nêbenê. Aştî bi îradeyê şarî û bi rayberîya ci mumkin a.”
‘Eke gamî nêrê eştene proses do bixetimîyo’
Welatîyan bêgamîya dewlete ser o zî vat, eke gamî nêrê eştene rewşe do hîna xirab biba, sebrê şarî nêmaneno, proses xitimîyeno û omidê çareserîye zî werte ra wedarîyena.
