Amadekarîyî seba Festîvala Fîlman a Mîyanneteweyî ya Rojava ya 6. dewam kenê. Komîteya amadekarîye dîyar bîya û rojanê ameyoxan de muracatê fîlman do dest pêbikerî.
Goreyê melumatan, komîteya amadekarîye amade ya û dima ra do muracatê fîlman bêrê girewtiş. Yeno pawitiş ke festîvale aşma teşrîna peyêne ya 2026î de bêra viraştene. Yeno texmînkerdene ke beno ke çarçewaya mîyanneteweyî de muracatî bêrê girewtiş labelê hema hûmara fîlman û festîvale do kamcîn şaristan de bêra viraştiş, dîyar nîyo.
Festîvale reya 5. 13-20ê teşrîna peyêne ya 2025î de Qamişlo de ameybî kerdene. O wext 81 fîlmî û 22 senaryoyî ameybî mojnayene. Mîyanê înan de 8 fîlmê mîyanneteweyî, 21 belgeselî, 8 fîlmê Kurdkî, 37 fîlmê kilmî û 7 fîlmê Sûrîye ca girewtbi.
Festîvala Fîlman a Rojava reya ewiline 2016î de ameybî organîzekerdene. Ya 2. 13ê teşrîna peyêne ya 2017î de Qamişlo de ameye viraştene. Ya 3. aşma teşrîna peyêne ya 2018î de Kobanî de virazîyaye. Festîvala 4. 13ê teşrîna peyêne ya 2019î de reyna Qamişlo de ameye organîzekerdene.
