Ciwanê bi nameyê Seyîtxan Pala ke 10 serrî verê cû Beşê Muhendisî yê Unîversîteya Yuzuncu Yilî ya Wanî qedênayo, rîyê bêkarîye ra Colemêrg de meslekê hingdarîye keno.
Hingdarîye meslekanê tewr kehen ê merdimîye ra yew o ke ewro zî xeylê cayanê dinya de yeno kerdene. No kar zozananê berzan de, mîyanê boya vilikan de yeno kerdene û hetê pawitişê ekolojî ra zî zaf muhîm o. Zozananê berz û asêyan ê Colemêrgî de, hingdarîye bi vize-viza hingan yena kerdene. Ciwanê bi nameyê Seyîtxan Pala qedênayîşê unîversîte ra pey, polîtîkayanê îqtîdarî yê bêkarîye û çinbîyayîşê îmkanan ra, verê xo da meslekê kal û pîran, hingdarîye. Seyîtxano ke no des serrî yo hingdarîye keno, çimanê xo hingan reyde akeno û înan reyde gêno.
Verê xo da hingdarîye
Seyîtxan Palayî des serrî verê cû Beşê Muhendsîya Înşatî yê Unîversîteya Yuzuncu Yilî ya Wanî de qedêna, labelê kar nêdi. Seyîtxan Pala nê halî ra sey bêîmkanîye û netîceyê polîtîkayanê îqtîdarî şîrove keno û verê xo dano meslekê pîyê xo hingdarîye. Seyîtxan Palayî bal ant serê şert û mercanê meslekê hingdarîye û vat: “Hingdarî serê sibayî saete hewt û nîm yan zî heştî de wirzenê, verê xo danê karê xo û halê hinganê xo kontrol kenê. Mîyanê kuwarî de hingî zeîfî û yê bihêzî zî est ê. Hingê bihêzî piştgirîye danê hinganê zeîfan ke ê zî bibê xurt. Reyna hingdarî zereyê kuwaran zî gemar û lêminîye ra pak kenê.”
‘Hingî germîye ra hes kenê’
Seyîtxan Palayî dîyar kerd ke hingî serdî ra hes nêkenê, ganî cayê înan her tim germ bo û wina dewam kerd: “Ma wisarî cayê hingan vurnenê. Payîzî zî ma înan dewan ra benê herêmanê german ke wextê zimistanî tede vewre nêvara. Eke cayê hingan germ û weş bo, ê zaf benê. Çunke emrê hingan 44 rojî yo, ganî her tim hingê neweyî bêrê dinya ke azê înan kêmî nêbo yan zî nêqedîyo.”
‘Hingimêno heqîqî bê derman û bê şekir o’
Dewamê qiseykerdişê xo de Seyîtxan Palayî derheqê viraştişê hingimênê heqîqî de qisey kerd û vat: “Hingimêno tewr sade, hingimêno verên û kuwareyî yo. Wexto ke ti payîzî ra hetanî peynî destê xo nêdê piro, o beno hingimênê heqîqî. Reyna eke ti şeker û dermanê kîmyewî nêdî hingan, o hingimên beno derman û qalîteyê ci berz beno.”
‘Nêweşîya tewr xirabe espij î’
Seyîtxan Palayî dîyar kerd ke nêweşîya tewr xirabe ya hingan sipih a û qiseykerdişê xo wina domna: “Espijê înan espijê sereyê merdiman yan zî yê pezî yo. Wexto ke keweno mîyanê hingan, verî per û çenganê înan wenê, hingî pûç benê û mirenê. Espijî tewr zaf mîyanê kateyanê hinganç nêran de xo pîl kenê û dima heme kuwareyan de vila benê. Seba qedênayîşê espijan, hingdarî dermanê fermî yê kîmyewî yan zî rêbazê xozayî û vaşê taybetî şuxulnenê.”
‘Hingêka karkere roje de 2 hezar vilikan zîyaret kena’
Seyîtxan Palayî vat ke her kuware de tena yew hinga makî est a û vat: “Hinga makîye maya kuware ya û her tim çêlîkan virazena. Hingê karkerî her tim teber de xebitîyenê, tozê vilan û nektarî anê. Hingêka karkere roje de nêzdîyê 2 hezar vilan zîyaret kena. Hingê nêrî kar nêkenê, tena semedê viraştişê çêlikan bi hinga maye reyde xebitîyenê. Wextê arêdayîşê hingimênî zî payîz o. Ma hingimêno zêde gêne, labelê ma para hingan zî tede verdenê. Goreyê hesabê hingan, ma mîyanê 4 û 6 çîtan de seba înan hingimên înan verdanê ke zimistanî vêşan nêmanê.”
